-- Билиҥҥи информация үйэтигэр литература маассабай, коммерческай уонна дьиҥнээх, хаачыстыбалаах, духуобунай  диэҥҥэ арахсар. Салайар эргимтэҕэ ити икки көрүҥү арааран, дьиҥнээх литератураҕа сөптөөх сыһыан үөскүүрүгэр баҕарабын. Суруйааччы дьиҥнээх духуобунай үлэтэ сыаналанар кэмэ кэллэ. Билиҥҥитэ эдэр суруйааччы бэйэтин айар үлэтинэн дьиэ кэргэнин иитэр, аһатар-таҥыннарар кыаҕа суох, ол иһин икки үлэҕэ ырыта тыыттаран, түүннэри суруйан, коммерческай литератураҕа охторо элбээтэ. Онон суруйааччы статуһун үрдэтэргэ судаарыстыба өттүттэн өйөбүл, көмө наада. Литератураҕа бэйэлэрин кылааттарын киллэрэ, күннэтэ айа-тута сылдьар дьоҥҥо туһааннаах өйөбүл көрүллэрэ эрэйиллэр.

Эдэр ааптардарга болҕомто ууруллуон наада, тоҕо диэтэр, көлүөнэлэр ситимнэрэ быстыа суохтаах. Ил Дархан бу сайын икки сойуус суруйааччыларын кытта көрсүбүтэ, аны үүнэр сылга эдэр суруйааччылары кытары көрсөрүн кэтэһэбит. Саха литературатын билигин Интернеккэ, информационнай ситимнэргэ күүскэ киллэриэххэ наада, сайдыы хаамыыта бу чэрчитинэн барар.  

Ил Дархан тыл бэлиитикэтин туһунан этиитигэр толору сөбүлэһэбин. Тыла суох литература сайдыбат, тыла суох норуот эстэр. Онон тылбытын, литературабытын көмүс курдук күндүтүк тутан, кэлэр көлүөнэлэргэ хаалларыахтаахпыт. Литература сылыгар суруйааччы статуһа үрдүө,  уопсастыба сыһыана уларыйыа диэн эрэнэбин.