Аан дойду чемпионнара Виктор Лебедев уонна Радослав Великов табаһыттар бырааһынньыктарыгар ыалдьыттаатылар

Көҥүл тустууга аан дойду икки төгүллээх чемпиона Виктор Лебедев төрөөбүт дойдута Томпо эбээн национальнай нэһилиэгэ буолар. Кини кэмиттэн кэмигэр дьонун көрсө, сынньана, бултуу кэлэн барар.

Бу соторутааҕыта табаһыттар бырааһынньыктарыгар Виктор доҕорунаан, Пекиннээҕи Олимпиада боруонса призера, аан дойду чемпиона болгарин Радослав Великовтыын уонна аҕа кынна, Саха сирин Ил Дарханын сүбэһитэ Михаил Эверстовы кытта кэлэ сырытта. Кинилэри бастаан Хаандыгаҕа сахалыы алгыһынан уонна кымыһынан көрүстүлэр.
Салгыы Тополинайга 300 км айаннаан бастакы күн Томпо эбээн национальнай нэһилиэгин туһунан историческай наука кандидата Николай Николаев кинигэтин сүрэхтэниитигэр сырыттылар.

Нөҥүө күнүгэр табаһыттар бырааһынньыктара Томпо үрэх мууһугар халлааҥҥа харбаһар хайалар күөннэригэр, күн уотугар күлүмүрдүү оонньуур муус-маҥан хаар үрдүгэр, киһи хараҕа саатар күн сыламын анныгар буолла.
Наартанан уонна уучаҕынан сүүрдүүгэ эр дьон, дьахталлар уонна оҕолор тус-туспа бөлөхтөрүнэн күрэхтэстилэр. Табаһыттар ыстаадалартан кэлэн күөн көрүстүлэр. Виктор уонна Радослав эмиэ кытыннылар, кинилэр охтубакка биэтэккэ кэлбиттэриттэн көрөөччүлэр үөрдүлэр. Төһөтүн да иһин Виктор орто кылааска Кириэс Халдьаайы спортивнай оскуолатыгар үөрэнэ барыаҕыттан аҕыйахта табаны мииммит буолуохтаах. Ол да буоллар аҕата, таба иитэр «Томпо» кооператив директора Николай Христофорович кыттыахтааххын диэн этиитин быһа гыммакка ылыннаҕа. Оттон күннээх Болгария уола Радослав Великов үйэтигэр аан бастаан табаны мииннэҕэ.
Виктор Лебедев куруутун буоларын курдук биир дойдулаахтарыгар кэһиилээх кэлбит. Араас куонкурстарга уонна күрэхтэһиилэргэ кыайбыт оҕолорго кини аҕалбыт бириистэрин туттардылар.