Пляжка тустуу быраабылатынан биһиги хапсаҕайбытыгар майгынныыр спорт көрүҥэ. Быйыл иккис сылын Саха сирин тустууктара Россия аатыттан туһуннулар.

Кумахха буолбут күөн көрсүүгэ чемпион аатын уонна бириистээх миэстэни ылар иһин 14 дойду спортсмена кытынна.  

Олимпиада саҕаламмыт сиригэр - Грецияҕа Саха сирин спортсменнарын хапсаҕай федерациятын президенэ  Николай Румянцев иилээн-саҕалаан илтэ. Ааттаах-суоллаах тустууктары Л.Спиридоновы, Ю.Старостины, П.Саввиновы,Н.Николаевы таһынан күрэхтэһиигэ Россияҕа эдэрдэр сүүмэрдэммит хамаандаларын тренерэ Петр Юмшанов, Саха сирин үтүөлээх тренерэ Петр Бурцев сырыттылар.

Бээтиниссэҕэ 18-гар диэри саастаах кадеттар ортолоругар 17 саастаах  Никита Валеев (Дьокуускай) Швеция, Норвегия, Румыния, Эстония уонна Греции бөҕөстөрүнүүн тустан аан дойду чемпионатыгар үрүҥ көмүс мэтээли ылары ситистэ.

Субуотаҕа былырыын Мароккаҕа аан дойду чемпионатыгар боруонса мэтээли ылбыт  Антон Захаров үрүҥ көмүс мэтээллэннэ.

Өрөбүл түүн көҥүл тустууга аан дойдуга үһүс бириистээх миэстэлээх, Олимпиада кыттыылааҕа, УОР дириэктэрин солбуйааччы Леонид Спиридонов пляжка тустуу аан дойду чемпионатын муҥутуур кыайыылааҕа буолла.

 Юрий Старостин иккис кыһыл көмүс мэтээли ылла. Кини Үөһээ Дьааҥыттан аан бастакы аан дойду чемпиона. Биир дойдулааҕа  Василий Стручков дьулуурдаахтык тустан боруонса мэтээли ылла.

Саха сиригэр хапсаҕай федерациятын салайааччылар Николай Румянцев уонна Петр Юмшанов ФИЛА президенин Ненад Лаловичы кытта көрүстүлэр. Аан дойдуга ааттаах-суоллаах тустуук Саха сиригэр кэлэ сылдьыан баҕарарын, ону таһынан пляжка тустуу норуоттар икки ардыларынааҕы турнирдарын Саха сиригэр ыытар туһунан республика  бэрэстэбиитэллэрин туруорсууларын өйөөтө.