Егор Афанасьевич бастаан оҕо саадыгар сырытта. Оҕолору, үлэһиттэри кытта кэпсэттэ, кырачааннар ырыаларын-тойуктарын иһиттэ, үлэ-хамнас хайдах баран иһэрин билистэ.

Ол кэнниттэн икки сыллааҕыта тутуллубут саҥа, сырдык, билиигэ кынаттыыр оскуолаҕа тиийэн кылаастарга киирэн үөрэнээччилэрдиин ирэ-хоро сэһэргэстэ. Онтон дьиэлэрин толору хааччыллыылаах гына оҥустубут Григорьев Данил Данилович дьиэ кэргэнигэр сылдьан хайдах дьаһанан, оҥостон олороллорун көрдө-иһиттэ.

Мантан салгыы «Тускул» кииҥҥэ олохтоохтору кытта көрүстэ. Долгутар боппуруостарын ыйытаары, туруорсаары элбэх киһи муһунна. Кэпсэтии иннинэ үөрүүлээх быһыыга-майгыга үлэ уонна тыыл бэтэрээнигэр Соловьева Анна Иннокентьевнаҕа Улуу Кыайыы 70 сыллаах юбилейнай мэтээлин туттарда.

Көрсүһүү кэпсэтии быһыытынан барда. Ол курдук, олохтоохтор сүрүннээн ууга баралларынан сибээстээн, Алдан уонна Өлүөнэ өрүс төрдүгэр дириҥэтэр үлэ ыытылларын, саҥа оҕо саадын «Үтүө дьыалаҕа» киллэрэн түргэтэтэри, Хатырыкка диэри суол оҥоһуутун, олоҕу кытта тэҥҥэ хардыылыыр инниттэн кытыы сытар нэһилиэктэргэ Интернет ситимин күүһүрдэри, оттуур ходуһалары сөргүтэргэ мелиорация үлэтин тэрийиини, тыа сирин олохтоохторо оҥорор бородууксуйаларын сөптөөх сыанаҕа туттаралларын туруорустулар. Хотон туттубут бааһынай хаһаайыстыбалар ороскуоттарын толуйуу көрүллэрин, ыраах сытар нэһилиэктэргэ почта үлэтэ тоҕо мөлтөҕүн, нефть уонна газ идэлэригэр үөрэммит выпускниктар төһө үлэ булалларын туһунан ыйыталастылар.

Кэпсэтии кэнниттэн Ил Дархан Егор Борисов олохтоохтор олус сэргэхтэрин, нэһилиэк баһылыгын Николай Соловьеву дьонун-сэргэтин олоҕо-дьаһаҕа тупсарын туһугар туруулаһар эдэр эрчимнээх баһылык буоларын, хайа да улууска арбыннар курдук кииннэммит ититэр тиһиккэ холбонон, толору хааччыллыылаах дьиэлэрдээх нэһилиэк суоҕун бэлиэтэээн туран, үлэлэригэр-хамнастарыгар, саҥа сайдыы саҕахтарын хаҥатар тутууларга хонторуоллаһыаҕын биллэрдэ.