Тыа сирин оҕото үүнээйи олордуутугар, көрүүтүгэр-харайыытыгар сыстаҕас буола улаатыахтаах диэн Юрий Прокопьев аатынан орто оскуола технологияҕа уонна биологияҕа учууталлара «Оҕо - инники кэскилбит» диэн бырайыак суруйан, 40 тыһыынча солкуобайдаах грант сүүйбүттэрэ. Граны сайыҥҥы теплица тутуутугар туһанан, үүнээйи, оҕуруот астарын олордон, өлгөм үүнүүнү ылан сүрдээҕин үөрбүттэрэ. Оттон ааспыт күһүҥҥэттэн оскуола дириэктэрин өйөөһүнүнэн кыһыҥҥы теплица тутуллан, олунньу ыйга ититиитэ холбонон, үүнээйи сиэмэтин ыһан, бу күннэргэ бастакы оҕурсуларын быһаары сылдьаллар. Инникитин оскуола салалтата агро-хайысханы тутуһан үлэлиир былааннаах.

Үүнээйи олордуутунан сөбүлээн, умсугуйан дьарыктанар технология учуутала Наталья Павлова сэттис уонна онус кылаас кыргыттарын оҕуруот аһын көрүүгэ-харайыыга уһуйар. Кыргыттар үүнээйи олордуутун, үүнүүтүн кэтээн көрөллөр, күннүктэригэр бэлиэтэнэллэр, үгүһү-туһалааҕы биллибит диэн үөрэллэр.

Марфа Степанова, 7-с кылаас үөрэнээччитэ:

- Быйыл сайын оскуолабыт оҕуруот аһын үүннэриигэ эбии үс улахан теплицаны тутары, сайыҥҥы лааҕыры үлэлэтэри былаанныыр.
Наталья Павлова, технология учуутала:

- Бу курдук түбүктээх үлэбит үтүө түмүктэммититтэн бары да олус үөрэбит. Билигин аны ыам ыйыгар үүнээйилэрбитин сайыҥҥы теплицаҕа көһөрүөхпүт.