Соторутааҕыта Киин үлэһиттэрэ Элгээйигэ сырыттылар. «Оһуор» Култуура киинигэр нэһилиэк олохтоохторугар «Кэскил» салайааччыта Прокопьева А.А. бу сыл тохсунньу 1 күнүттэн саҥа киирбит «Об основах социального обслуживания граждан в РФ» 442 нүөмэрдээх сокуону нэһилиэнньэҕэ билиһиннэрдэ, бииргэ үлэлэһэр коллегаларыгар махтал суруктары туттартаата. Киин специалистара олохтоохторго араас консультациялары оҥордулар.

Ону тэҥэ нэһилиэнньэ көрдөһүүтүнэн Сунтаартан парикмахердар, косметологтар тахсан үлэлээтилэр. Сунтаар предпринимателлэрэ 15 элбэх оҕолоох уонна кыһалҕалаах ыалга таҥаһынан-сабынан көмө оҥордулар. Манна предпринимателлэр Кондакова А.В., Сон Л.К., Ю Л.К., Иванова Л.И., Никитина Е.В., Степанова А.Н. уо.д.а. көхтөөхтүк кытыннылар.

Түмүккэ, тэрээһин кыттыылаахтара сэргэх эҕэрдэ концерт көрдөрдүлэр. Концеры СР социальнай сулууспатын туйгуна Пустолякова Л.Н. иилээн-саҕалаан ыытта. Элгээйи нэһилиэгин дьоно-сэргэтэ тэрээһинтэн олус астынна уонна «Кэскил» киин коллективыгар махталын эттэ.