Хаандыгаҕа Сүүрүү күнэ ыытылынна

Чөл олоҕу тутуһар дьоҥҥо анаан Хаандыгаҕа Сүүрүү күнэ ыытылынна. Бу сырыыга оҕолор уонна улахан дьон тус-туһунан күрэстэстилэр.


Үлэ күнүн ортото буолан дуу, улахан дьоҥҥо кыттааччы аҕыйах. 400 м түөрт дьахтар куоталаста. Манна хотугу многоборьеҕа СР спордун маастара, Саха сирин икки төгүллээх абсолютнай кыайыылааҕа Наталья Пермякова бастыыра эрдэттэн биллэр этэ. Оксана Севрюк - дэгиттэр спортсмен. Киирэ анньыытыгар улуус чемпионката. Кини иккис буолла. Чемпионкаттан икки төгүл аҕа саастаах, «Томпо илдьитэ» хаһыат корреспондена Евдокия Неустроева биэтэккэ үсүһүнэн кэллэ. Кини спорт бары көрүҥэр тэһэ астаран кыттааччы, нуучча дуобатыгар Саһыл нэһилиэгин икки төгүллээх чемпионката, улуус учууталларын спартакиадатыгар үһүс, ытыыга Томпо улууһуттан төрүттээх РФ спордун маастардарын турнирыгар, мас тардыһыыга Эһэ нэһилиэгэр иккис миэстэлэрдээх.

Эр дьоҥҥо 800 м араа-бараа саастаах биэс уол сүүрдэ. Манна Ярослав Севрюк уонна Дьокуускайдааҕы физкультура институтун бүтэрбит, Өлүөхүмэҕэ Саха сирин норуоттарын оонньуутугар Томпо аатын көмүскээбит Александр Винокуров икки ардыларыгар хатыйсыылаах киирсии буолла. Барытын тиһэх 100 м быһаарда, Севрюк бастаата.
Кыайыылаахтарга өйдөбүнньүк бэлэхтэри туттардылар эрээри, грамота, мэтээл буолуохтааҕар Сүүрүү күнүгэр кыттыбыттарын туһунан туоһу сурук да суох буолан биэрдэ.