Хаандыгаҕа тэрилтэ салайааччыларын күрэхтэһиитэ аан бастаан ыытылынна

Кыайыы 70 сылыгар анаан Хаандыгаҕа аан бастаан тэрилтэ салайааччыларын күрэхтэһиитэ буолла. Үлэ кэнниттэн «АЛРОСА» Спорт уонна культура киинигэр икки күннээх күрэхтэһиигэ 12 киһи кытынна. Кинилэр ортолоругар олох-дьаһах, коммунальнай хаһаайыстыба, айылҕа харыстабылын, хайа-геологическай техникум, үөрэх уонна тыа хаһаайыстыбатын салааларын, дьаһалта, «АЛРОСА» Спорт уонна культура киинин салайааччылара бааллар. Барыта биэс көрүҥҥэ илин былдьастылар.

Улуус салайааччыларын ортолоругар биллэр-көстөр спортсменнар аҕыйаҕа суохтар. Ол курдук, бу күрэхтэһиигэ кик-боксиҥҥа Европа боруонса призера, Россия спордун маастара Петр Новгородов, көҥүл тустууга Россия спордун маастара Александр Андреев, мас тардыһыытыгар Саха сирин муҥутуур кыайыылааҕа Афанасий Саввин, Бүлүүгэ ыытыллыбыт Манчаары оонньууларыгар хапсаҕайга ветераннарга иккис буолбут Владимир Илларионов кытыннылар. Көҥүл тустууга ССРС, хапсаҕайга Саха сирин спордун маастара Анатолий Андреев куоталаһыыны судьуйаласта.
Дартска Хаандыга бөһүөлэгин баһылыга Михаил Алексеев бастаата. Тутуу салаатын салайааччы Айсен Данилов иккис, улуус баһылыга Георгий Герасимов үһүс буоллулар.
Баскетбол мээчигин быраҕыыга «АЛРОСА» СКК салайааччыта Афанасий Саввин бастыҥ көрдөрүүлэннэ. Иккис миэстэҕэ улуустааҕы дьаһалта үлэһиттэрин салайар сулууспа салайааччыта Владимир Илларионов, үһүскэ – Айсен Данилов таҕыстылар.
Футбол мээчигин кыра кээмэйдээх воротаҕа тэбиигэ эдэригэр мини-футболунан дьарыктаммыт Михаил Алексеев күннээтэ. Иккис миэстэни Хаандыгатааҕы нефтебаза салайааччыта, 52 саастаах Виктор Дронов, үсүһү - Афанасий Саввин ыллылар.

Остуол тенниһигэр улуус баһылыга Георгий Герасимов кыайыахтааҕа эрдэттэн сабаҕаланара. Кини оскуола саҕаттан билиҥҥээҥҥэ диэри бу көрүҥүнэн дьарыктанар. Студенныы сылдьан СГУ хамаандатыгар киирэн Саха сирин норуоттарын спартакиадатыгар алтыс буолбута. Улууска билигин да чемпионнуур. Барыларыттан аҕа саастаахтара Виктор Дронов аа-дьуо наллаан сылдьан үрүҥ көмүс мэтээли ылла. Үһүскэ Айсен Данилов таҕыста.
Бильярдка улуус баһылыга Георгий Герасимов эмиэ тэҥнээҕин булбата. Ол эрээри быһаарыылаах киирсиигэ бу көрүҥҥэ Хаандыгатааҕы хайа-геологическай техникум салайааччытын солбуйааччы Кузьма Сыромятников тэҥ киирсиигэ быраабыланы кэһэн хоттордо. Үһүс миэстэ иһин Михаил Алексеев үөрэх салаатын салайааччытын Виктор Новгородовы балачча тыҥааһыннаах киирсиигэ кыайда.
Уопсай түмүккэ Хаандыга бөһүөлэгин баһылыга Михаил Алексеев бастаата, иккискэ биир очконан хаалан улуус баһылыга Георгий Герасимов, үһүскэ улуустааҕы дьаһалта үлэһиттэрин киинин салайааччыта Владимир Илларионов таҕыстылар.
Алта күүстээх иһигэр туһааннааҕынан Кузьма Сыромятников, Айсен Данилов, улуус баһылыгын социальнай боппуруостарга солбуйааччы Александр Андреев киирдилэр.
Кыайыылаахтарга мэтээллэри уонна грамоталары туттардылар.