Эдьигээҥҥэ «Аюкта» оҕо куонкуруһа аан бастаан ыытылынна

Аҕыйах хонуктааҕыта Эдьигээҥҥэ оҕону эбии үөрэхтээһин киин тэрийиитинэн «Аюкта» оҕо фольклорнай фестивала ыытыллынна. Бырайыак ааптарынан «Северное сияние» ансаамбыл салайааччыта Евдокия Спиридоновна Алексеева буолар.


Улуустааҕы куонкурус-фестивалга «Елочка», "Звездочка", "Малыш" оҕо уһуйааннарыттан, Эдьигээн орто оскуолатыттан, оҕону эбии үөрэхтээһин кииниттэн, о.д.а. 200-кэ оҕо кытынна.
Куонкуруска хотугу норуоттар культуралара алта номинациянан көрдөрүлүннэ: норуот ырыата, норуот тылынан уус-уран айымньыта, фольклор үҥкүүтэ, эстрада үҥкүүтэ, эстрада ырыата, биирдиилээн уонна коллективынан үҥкүү. Номинациялар бастыҥнарыгар лауреат, дипломант ааттара иҥэрилиннэ. Фестивальга "Дылачакан", "Северное сияние" курдук уруккуттан көрөөччү биһирэбилин ылбыт коллективтар бэйэлэрин ааттарын бигэргэтэн куонкурус гран-при бирииһин хаһаайыннарынан буоллулар.
Быйылгы күрэскэ Лииндэ оскуолатын үөрэнээччилэрэ ордук үчүгэйдик кытыннылар. Ол курдук, Айыллаана Николаева («Норуот тылынан уус-уран айымньыта»), "Гарпанча" ансаамбыл («Фольклор үҥкүүтэ»), "Орончикан" дуэт («Эстрада ырыата»), Ада Корякина («Норуот ырыата») лауреаттарынан, Айыллаана Николаева («Норуот ырыата») бастакы степеннээх дипломанынан, "Гарпанча" ансаамбыл («Эстрада үҥкүүтэ»), Прасковья Гаврильева («Норуот тылынан уус-уран айымньыта») иккис степеннээх дипломаннарынан уонна Лиандра Алексеева («Эстрада ырыата)» үһүс степеннээх дипломанынан буоллулар.
«Норуот ырыатыгар» - Розанна Колесова (эбии үөрэхтээһин киинэ) уонна «Аюкта» ансаамбыл ("Звездочка" оҕо саада), «Норуот тылынан уус-уран айымньытыгар» - «Елочка» оҕо саада уонна Эдьигээн орто оскуолатын 3 «а» кылааһын үөрэнээччилэрэ, «Фольклор үҥкүүтүгэр» - Шура Максимова (эбии үөрэхтээһин киинэ), «Эстрада үҥкүүтүгэр» - "Узоры Севера" ("Малыш" оҕо саада), "Северное сияние" (эбии үөрэхтээһин киинэ) ансаамбыллар, «Эстрада ырыатыгар» - Ярослав Бобухов ("Малыш" оҕо саада), «Норуот үҥкүүтүгэ» - Настя Матвеева (оҕо искусствотын оскуолата) уонна "Дылачакан» ансаамбыл (эбии үөрэхтээһин киинэ) лауреат үрдүк аатын ыллылар.
Куонкурус кыттааччыларга уонна көрөөччүлэргэ дьиҥ-чахчы кэрэ бырааһынньыгынан буолла.