Ол курдук, кулун тутар 19 күнүгэр 171-а №-дээх улуус баһылыгын дьаһалыгар олоҕуран, тэрээһин боппуруостара быһаарыллыбыттара. Уоту умуруорууга хайа тэрилтэттэн хас киһи, туох техника үлэлиэхтээҕэ чопчуламмыта, эппиэттээх тэрилтэ салайааччылара анаммыттара. Хас биирдии муниципальнай тэриллиигэ баһаары утары үлэҕэ анаан уматык саппааһа хаһааныллыбыта.

Нэһилиэнньэҕэ иһитиннэрэр-биллэрэр үлэни ыытыыга “Ростелеком” тэрилтэтэ сибээһинэн, ас-үөл тэрилтэлэрэ ыксаллаах быһыыга-майгыга биригээдэлэри аһылыгынан, киин балыыһа баһаар буолар түгэнигэр үлэһиттэри наадалаах эминэн-томунан хааччыйалларыгар, “Колымское лесничество” управление хонтуруолу күүһүрдэригэр, эрдэттэн сэрэтии үлэни ыытарыгар этиллибитэ. Бу курдук бары кэриэтэ тэрилтэлэргэ ойуурга уот турар түбэтэтигэр тугу гыныахтаахтара былааҥҥа ыйыллыбыта. Ол инниттэн хас биирдии тэрилтэ салайааччыта ыксаллаах быһыыны-майгыны сэрэтиигэ, туоратыыга уонна баһаартан куттал суох буолуутун хааччыйыыга хамыыһыйа састаабыгар киллэриллибитэ. Бөлөҕү улуус баһылыгын бастакы солбуйааччы Р.С.Гаврильев салайар.

Күн бүгүн хас биирдии нэһилиэнньэлээх пууҥҥа добровольнай баһаарынай этэрээттэр бэлэмнэрин бэрэбиэркэлээһин, анал акталары толоруу ыытыллар.