Улуус үрдүнэн сир үлэтинэн дьарыктанар 61 хаһаайыстыбаҕа 2755,5 гектар иэннээх сиргэ сиик саптарыллыахтаах. Бурдугу ыһыыга 262,5, сүөһү эбии аһылыгар 272,9, хортуоппуйу ыһыыга 1736 тонна сиэмэ туһаныллыаҕа. Билиҥҥитэ 167 тонна бурдук сиэмэтэ хаһаайыстыбаларга баар. Быйылгы сезоҥҥа 104 трактор, 48 булуук, 35 сеялка итиэннэ 103 состоруллар араас техника туһаныллыаҕа.

Быйыл улуус үрдүнэн 5229 гектар иэннээх сиргэ ыһыы үлэтэ ыытыллара былааннанар. 1474 гектар иэҥҥэ бурдук, ити иһиттэн 183 гектарга сэлиэһинэй, 600 гектарга дьэһимиэн, 635 гектарга эбиэс ыһыллыаҕа. Бурдугу ыһыыга «Тумул», «Куолас», «Долоон» хаһаайыстыбалар үлэлэһиэхтэрэ.

2933 гектар бааһынаҕа сүөһү эбии аһылыга ыһыллыаҕа. Хаһаайыстыбалар биир сыллаах оту 1450, элбэх сыллаах оту 1483 гектарга ыһыахтара. Быйыл Чыамайыкыга П.А.Дьячковскай, Табаҕаҕа К.И.Бурнашев, Бүтэйдээххэ «Сомоҕо», Төхтүргэ «Солооһун» хаһаайыстыбалар аан бастаан 338 гектарга элбэх сыллаах оту ыһыахтара.

Итиэннэ 657 гектарга (197 гектарга ‒ тэрээһиннээх хаһаайыстыбалар, 460 гектар ‒ кэтэх хаһаайыстыбалар) хортуоппуй, 160 гектарга оҕурсу, 90 гектарга хаппыыста, 28 гектарга сүбүөкүлэ, 5 гектарга арбуз о.д.а. олордуллуоҕа.

Ыам ыйын 18 күнүнээҕи туругунан, «Долоон», «Тумул», «Куолас», Мохначевскай хаһаайыстыбалара 299 гектарга сииги саптарыы үлэтин ыыттылар. Майаҕа «Майа-МТС» ТХПК үлэһиттэрэ Тар бааһынаҕа 30 гектарга дьэһимиэн ыстылар.