Уопсайа 46 тыһ. т тутуу матырыйаала аҕалыллан иһэр. Аммаҕа 51 тыһыынча таас чох навигация бастакы түһүмэҕэр тиэллиэхтээх. Алдан өрүс муустан ыраастанна даҕаны, Дьабарыкы Хайа шахтатыттан икки суудуна айаҥҥа турунуохтаах. Былырыын Амма өрүс уутун таһыма эмискэ түһэн, таһаҕаһы тиэммит суудуналар сатаан киирбэккэ, оттук массыынанан тиэллибитэ.

Бүлүүгэ ГЭС-тэн урукку сыллардааҕар элбэх уу ыытыллан, гидрологтар навигацияҕа бэртээхэй усулуобуйа үөскээбитин этэллэр. Бу хайысханан пароходство 60 тыһ. т уматыгы, техническэй аналлаах бородууксуйаны, аһы-үөлү тиэйиэхтээх.

Ыам ыйын 14 күнүгэр Уус-Куттан туруммут Николай Ткачев капитаннаах «Ленанефть-2063» танкер 2620 т дизельнэй уматыгы Ньурбаҕа тиэрдиэҕэ.