«Эрчимнээх эбээлэр» чөл олоҕу туругурдаллар

Покровскайбытыгар саастаах дьон доруобуйаларын көрүнэллэр, чөл олоҕу тутуһаллар, үүнэр көлүөнэҕэ холобур буолаллар.


«Эрчимнээх эбээлэр» түмсүү кыттыылаахтара бэрт сэргэхтик, күө-дьаа кэпсэтэ-кэпсэтэ спорт саалаҕа киирэн эттэрин-сииннэрин уһугуннаран, футбол оонньоон мээчиги эккирэтэ сүүрдүлэр. Саамай эдэрдэрэ 60-рын ааспыттар, онтон аҕа саастаахтарынан 82-лээх Любовь Афанасьевна Яковлева буолар. Саастарынан икки бөлөххө арахсан араас эрчиллиилэри оҥороллор. Доруобуйалара лаппа тупсубутун, маннык түмсүү баарыттан үөрэллэрин этэллэр. Манна кэлэн сэргэхсийэбит, дьону-сэргэни кытта алтыһабыт диэн үөрэ-көтө кэпсииллэр. Бүгүн, саастаах дьоммут ГТО нуорматын туттарыыны саҕалаабыттар. Инструктордарыгар П.Д.Ефимовка махталлара улахан.
- Манна куорат үлэлээбэт кырдьаҕас дьоно сылдьар. Доруобай дьон уонна инбэлииттэр диэн икки бөлөҕүнэн дьарыктары-эрчиллиилэри ыытабыт, - диир Петр Дмитриевич. - Тренажернай уонна спортивнай саалаҕа араас эрчиллиилэри оҥоробут, дьарык кэнниттэн торуоскаларын бырахпыттар, токуруйбут атахтарын көннөрбүттэр бааллар. Футбол оонньууллар, скандинавскай хаамыыны сөбүлүүллэр, хайыһардыыбыт, хаҥкылыыбыт, скакалкалыыбыт, обруһунан, лиэнтэнэн эрчиллиилэри оҥоробут.

Доруобуйаларын көрүнэн, тупсубутун туһунан анкета толороллор, ырыталлар. Дьонум олус көхтөөхтөр, күрэхтэһиилэргэ кытталлар, дьиэҕэ олорон хаалбакка доруобуйаларын тупсаран, чөл олоххо тардыһаллпар, - диэн Петр Дмитриевич иитиллээччилэрин туһунан үөрэ кэпсиир.
«Эрчимнээх эбээлэр» быйылгы сезону бэрт сэргэхтик түмүктээн эрэллэр. Нэдиэлэҕэ түөртэ ыытыллар дьарыктарыгар көтүппэккэ сылдьа сатыыллар.
Түмүккэ ГТО-ну ситиһиилээхтик туттарбыттарга спорт салайааччылара мэтээллэри уонна грамоталары туттарда.