Быйыл Дьокуускай куорат ыччаттара хамаанда тэринэн кэлэн кыттыыны ыллылар. Барыта холбоон 100-тэн тахса ыччат Уөһээ Бүлүүттэн, Ньурбаттан ыһыах ыһар «Кыталыктаах» туонатыгар слетка муһуннулар. Ыҥырыылаах ыалдьыттарынан Ил Тумэн дьокутаата А.А.Григорьева, Дьокуускай куорат «ЗОЖ» уопсастыбаннай фондатын дириэктэрэ Е.И.Шудря, култуура уонна искусство Арктическай институтун ректора С.С. Игнатьева, ХИФУ студенческай сайдыытын управлениятын начальнига А.А. Ильин, Норуоттар оонньууларын 2 төгуллээх призера, IV-V «Азия оҕолоро» оонньуулар призердара САХАВА бастын волейболиһа Аина Стручкова буоллулар. Норуот дьокутаата Антонина Григорьева эҕэрдэ тылыгар «Саха сирин байым баайа хостонор баай, алмаас буолбатах. Кини сүрүн барҕа баайа - кэнчээри ыччата», - диэн бэлиэтээн эттэ. Бэрэсидьиэн уонна Бырабыытылыстыба сүрүн болҕомтону чөл олохтоох ыччаты иитиигэ ууралларын эттэ.

     Ыччаттар икки күн араас лиэксийэлэргэ, маастар-кылаастарга сылдьан, дискуссияларга кыттан, элбэҕи билэн, туһалааҕы истэн, санаа атастаһан бардылар. Ону таһынан, араас курэхтэһиилэргэ, көрдөөх онньууларга, гитаранан ырыаҕа, пейнтболга кытыннылар. Уоттаах- күөстээх дискотекаҕа үҥкүүлээтилэр.

    Оҕолор бу икки кун Ньурба үтүө-мааны сиригэр сүрдээх тэрээһиннээхтик, туһалаахтык, саҥа доҕоттордонон, биир санаалаахтарын булан, сынньанан тарҕастылар. Эдэр ыччат өрөспүүбүлүкэ уопсастыбаннай, политическай, култуурунай олоҕор актыыбынай кыттыыны ыларга, чөл олоҕу пропагандалыыр тэрээһиннэри ыытарга, бииргэ сомоҕолоһон үлэлииргэ ыҥырыы таһаардылар, тустаах быһаарыыны ылыннылар.