Эмиэ да быстах ардаҕынан ибиирэр былыттаах күнү аахсыбакка, Дьокуускайга, Культура уонна сынньалаҥ пааркатыгар төрөппүттэр оҕолорун кытта сцена тула муһуннулар. Эрдэттэн кэлэн ыйыталаһан, «Бичиктэр» тэрээһиҥҥит манна буолар дуо?» диэн күүтэ-долгуйа сырыттылар. Бырааһынньыктааҕы көрү-нары Саха сирин Бриллиантовай циркэтин артыыстара саҕалаатылар. Анастасия Винокурова сытан эрэ бэрт чэпчэкитик атаҕынан остуолу салгыҥҥа өрө тэбэ-тэбэ эргитэн, Пантелеймон Габышев уонча мээчигиэнэ жонглируйдаан көрөөччүлэри сөхтөрдүлэр.

Кинигэ атыылыыр сулууспа салайааччыта Луиза Бястинова үөрэх дьыла түмүктэммитинэн оҕолору эҕэрдэлээн туран, сайыҥҥы сынньалаҥы кинигэ ааҕан туһалаахтык атааралларыгар ыҥырда. «Бичик» кыһа оҕолорго анаан саастарынан көрөн «саҥарар», сайыннарар, ааҕыыга, сурукка, суокка эрчийэр кинигэ, остуоруйа, таайбараҥ, остуол оонньуутун арааһын оҥорон таһаарар. Онон, билии аартыгын кинигэни кытта бииргэ дабайыҥ, ааҕар киһи олоххо ситиһиилээх буолар», -- диэн этэн туран, Луиза Михайловна түһүмэхтэринэн оҕолорго анал ааттары, бэлэхтэри туттартаата.

«Кырачаан ааҕааччы» диэн анал аакка алта саастаах саамай кыра саастаах ааҕааччыбыт Дьокуускайтан Сандаара Матвеева, Бүлүүттэн Аман Иванов уонна Ньурбаттан Алина Алексеева тигистилэр. «Ааҕар дьиэ кэргэн» анал ааты Бүлүү куораттан Тускулаана, Санаайа, Айхал, Туйаара, Алгыстаан Тутукаровтар, Дьокуускайтан Вика, Эду, Ярик Степановтар уонна Мэҥэ-Хаҥалас Тыыллыматыттан Арина, Валерия Борисовалар ыллылар.

«Ааҕар кылаас» анал ааты Сунтаар улууһун Кэмпэндээйи орто оскуолатын 1 кылааһын, Мэҥэ-Хаҥалас улууһун Тыыллыма орто оскуолатын 2 уонна 4 кылааһын үөрэнээччилэрэ ылан, бэлэхтэри тутан үөрүүлэрэ өссө үрдээтэ. Дьэрэкээн ойуулаан, киэргэтэн, ураты эппиэттэри ыыппыт оҕолор - Дьокуускайтан Саша Илларионов, Валерия Пономарева, Тааттаттан Ариан Луковцев, Айтаана Тарабукина «Кыайыыга дьулуһуу» диэн анал аакка тигистилэр. «Бичик» кыһа туруорбут флешкаларын, колонкаларын, наушниктарын, кинигэ арааһын бэлэх ылан оҕолор сүргэлэрэ көтөҕүллэн, астынан-дуоһуйан инникитин өссө да күрэстэргэ кыттыах буоллулар.

Саамай долгутуулаах түгэн үүнэн, супер-бириис хаһаайыннарын биллэрэ сценаҕа «Тобул» халандаар тэрийээччитэ, кинигэ кыһатын ааҕааччы киэҥ араҥатыгар туһуламмыт редакциятын сэбиэдиссэйэ Надежда Андросова таҕыста:

-- Бу сүүйүүлээх халандаар оонньуутугар өрөспүүбүлүкэ 17 улууһуттан барыта 90 оҕо кытынна, ол иһигэр 3 дьиэ кэргэн, 3 кылаас. 6 саастаах уһуйаан иитиллээччититтэн 10 кылаас оҕотугар тиийэ. Онон кыттыбыт оҕолор кыайыыга дьулуурдарын, олус үлэһиттэрин бэлиэтиибит, -- диэтэ.

Дохсун ытыс тыаһынан доҕуһуоллатан суотабай төлөпүөн Дьокуускай куорат 23 нүөмэрдээх оскуолатын 2 кылааһын үөрэнээччитигэр Тихон Кириллиҥҥэ, планшет Бүлүү улууһун I Күүлэт оскуолатын 2 кылааһын үөрэнээччитигэр Олеся Григорьеваҕа тигистэ. Россияҕа Литература сыла биллэриллибитин өйөөн, оҕолор утумнаахтык ааҕалларын, үгүһү билэллэрин көҕүлүүр сыалтан, Ыччат уонна дьиэ кэргэн политикатын миниистирин I солбуйааччыта, «Биир Ньыгыл Россия Молодая Гвардия» ыччат тэрилтэтин бэрэссэдээтэлэ Гаврил Семенов туруорбут бэлэсипиэт бэлэҕэ Дьокуускай куорат 17 нүөмэрдээх оскуолатын 2 кылааһын үөрэнээччитигэр Валерия Пономареваҕа туттарылынна.

Кыайыылаахтары «Ай-сулустар» этно-студия уһуйуллааччылара эҕэрдэлээтилэр. Биллиилээх поэт, прозаик, оҕо суруйааччыта Сэмэн Тумат кинигэни кыра сааскытыттан таптааҥ, ааҕыҥ, элбэҕи билиҥ-көрүҥ, үөрэхтээх, сайдыылаах, үтүө дьон буола улаатыҥ диэн алгыһын анаата.

Салгыы бары кыттыбыт оҕолор Махтал суруктары кытта сэмэй бэлэхтэринэн бэлиэтэннилэр. Түмүккэ «Бичик» кыһа көрөөччүлэр ортолоругар Литература сылыгар викторина оонньотон, элбэҕи ааҕар, билэр-көрөр оҕолорго кинигэ арааһын бэлэх биэрдэ. Онон, кинигэҕэ оҕо-аймах интэриэһин күөдьүтэргэ, уус-уран айымньыны ааҕарга, көҕүлүүргэ эргиччи туһалаах уонна көдьүүстээх тэрээһин ыытылынна.