Чуолаан Муома улууһугар СР ыччат уонна дьиэ кэргэн политикатын министерствотын Күннэрэ ыытылыннылар.

Саҥа дьыл иннинээҕи күннэргэ миниистири бастакы солбуйааччы Гаврил Семенов, министерство муниципальнай тэриллиилэрин кытта үлэҕэ салаатын начальнига Гасан Гасанбалаев, министерство сүрүн специалиһэ Николай Макаров, «Лидер» ыччат көҕүлээһиннэрин киинин директора Софрон Попов, «Эдэр саас» хаһыат редактора Прокопий Бубякин Муома улууһун ыччатын кытта истиҥ көрсүһүүлэри тэрийдилэр, нуучча дуобатыгар сеанс, остуол тенниһигэр секцияны, «Брейн-ринг» оонньууну, «КВН» конкурсун ыыттылар, Хонуу, Соболоох, Победа нэһилиэктэрин социальнай эбийиэктэригэр, «Индигир уоттара» хаһыат редакциятыгар сырыттылар.

Гасан Гасанбалаев граннары оҥорууга сүбэлэри биэрдэ. Нэһилиэктэргэ ыччат көҕүлээһиннэрин өйөөһүҥҥэ сүрүн хамсатыынан граннар буолаллара кистэл буолбатах, оттон официальнай докумуоннары оҥоруу уопута тыа сиригэр олох кыра.

Делегация ону таһынан Соболоох, Буор Сыһыы нэһилиэктэригэр сырытта, онно ыччаты уонна үөрэнээччилэри кытта сэргэх мөккүөрдэр ыытылыннылар. Холобур, Буор Сыһыы ыччаттара министерство үлэһиттэрин иннилэригэр нэһилиэккэ ыччат площадкатын тутууну түргэтэтэр туһунан боппуруоһу туруордулар. Площадка кинилэр сүүйбүт граннарын суотугар тутуллуохтаах. Ити тутууну атырдьах ыйынааҕы халаан атахтаабыта, тутуу матырыйаалларын илдьэ барбыта. Өссө Соболоох ыччаттарын ордук сибээс боппуруостара долгуталлар. Кинилэр төрөөбүт нэһилиэктэригэр сотовай сибээс киириитин туруорсаллар.

Бүтэһик күҥҥэ Гаврил Семенов сарсыардаттан эдэр ыаллары кытта көрүстэ. «Муома оройуона» МТ баһылыгын кытта түмүктүүр мунньахха министерство уонна улуус икки ардыларыгар бииргэ үлэлээһиҥҥэ Сөбүлэһиигэ илии баттастылар.

Биллэриллибит Арктика сылын республика арктическай улуустара өрө көтөҕүллэн уонна улахан үлэҕэ бэлэмнээх көрсөллөр диэтэ улуус баһылыга Петр Черемкин.