Үөрүүлээх тэрээһин театр киирэр ааныттан саҕалаан уратытык саҕаланна. Арктика сылын үөрүүлээтик аһыы церемониятыгар кыттар дьону хотугу норуоттар национальнай көстүүмнэрин кэппит уолаттар уонна кыргыттар көрүстүлэр, хоту дойду олохтоохторун абыычайынан Чичипкан уонна Дельбурге сиэрин-туомун ыыттылар. Бырааһынньыгы "Хотугу кустук" диэн театрализованнай көстүү аста. Хотугу норуоттар ассоциациялара, "Долгунча" уонна "Русское Устье" ансамбллар, казактар хордара, "Аар аартык" уонна "Раздолье" ансамбллар тахсан, Саха сирин норуоттарын сомоҕолоһууларын көрдөрдүлэр.

Арктика сылын аһарыгар Саха Республикатын президенэ Егор Борисов Арктика эҥэригэр болҕомто ууруллубатаҕа 20 сыл буолбутун, араас бириичинэнэн Хотугу аҕыйах ахсааннаах норуоттар ахсааннара аччаабытын, маны чөлүгэр түһэрии, дьон олорор усулуобуйатын тупсарыы, төрүт омуктар культураларын уонна тылларын өссө күүскэ сайыннарыы кэмэ кэлбитин туһунан президент тоһоҕолоон бэлиэтээтэ. Республика аҕа баһылыга Российскай Федерация арктическай зоната сайдыытын стратегиятын олоххо киллэрии, Саха сирин арктическай уонна хотугу оройуоннарын экономикалара сайдыытын түстүүр, Хотугу сир аҕыйах ахсааннаах төрүт норуоттарын оруолларын үрдэтэр туһуттан Саха сиригэр Арктика сыла аһыллыбытын биллэрдэ.

Сценаҕа туруоруллубут экраҥҥа Арктика сыла саҕаламмытынан республика олохтоохторун Санк-Петербург губернатора Георгий Полтавченко, Чукотка автономнай уокуругун губернатора Роман Копин, Новосибирскай уобалас губернатора Василий Юрченко, Хабаровскай кыраай губернатора Вячеслав Шпорт эҕэрдэлэрэ таҕыста.

Холобура, Чукотка автономнай уокуругун губернатора Роман Копин: "Ыаллыы регионнар Арктическай зонаҕа киирсэн, тыйыс климаттаах усулуобуйаҕа олох бары салааларыгар биир хайысхалаах сайдан иһэбит. Социальнай, экономическай, научнай-технологическай эйгэлэр Арктика туспа сокуонугар олоҕуран сайдаллар. Кэлиҥҥи кэмҥэ биһиги арктическай регионнарбыт дойду салалтатын ураты болҕомтотугар киирдилэр. Сайдыы стратегията торумнанна, саҥа федеральнай программалар олоххо киирэн эрэллэр, -- диэн эҕэрдэтигэр бэлиэтээтэ.

Үөрүүлээх мунньахха ООН тулалыыр эйгэ GRID-Arendal программатын сүрүннээччи Джон Крамп, норуоттар икки ардыларынааҕы "Арктика Сэбиэтэ" тэрилтэ Секретариатын толорооччу директора Магнус Йоханессон, "Арктика университета" норуоттар икки ардыларынааҕы тиһик президенэ Ларс Куллеруда видеонан эҕэрдэлээн кыттыыны ыллылар.

Саха сирин олохтоохторун Арктика сыла аһыллыытынан СР Ил Түмэн Председателэ Александр Жирков, Госдума депутата, СР бастакы президенэ Михаил Николаев, "Орто Халыма улууһа" МТ баһылыга Евгений Слепцов, Хотугу сир аҕыйах ахсааннаах төрүт норуоттарын Ассоциациятын президенэ Андрей Кривошапкин уо.д. а. эҕэрдэлээтилэр. Андрей Васильевич бэйэтин этиитигэр: “Саха сиригэр Арктика сыла аһыллыытын Россия регионнара эрэ буолбакка, бүтүн аан дойду норуоттара болҕомтолоругар ыллылар. Онон быйылгы сылга Арктика хас биирдии улууһугар аадырыстаммыт көмө, өйөбүл оҥоһуллуон наада. Хоту дойду олохтооҕун дьылҕатын быһаарар дьиэ табатын иитиигэ өйөбүлү оҥорууну Федеральнай сокуон быһыытынан киллэрдэххэ, быйылгы Арктика сыла бэйэтин соругун ситиэ этэ диэн бэлиэтээтэ.

Саха сиригэр Арктика сылын аһыллыытаын үөрүүлээх тэрээһинэ оһуохайынан түмүктэннэ.