Арктика сылыгар Эдьигээҥҥэ саҥа таас балыыһа үлэҕэ киирдэ

Ахсынньы 25 күнүгэр Эдьигээҥҥэ балыыһа саҥа комплексын үөрүүлээхтик үлэҕэ киллэрии сиэрэ-туома буолла. Улуус баһылыга Алексей Мандаров бэлиэтээбитинэн, бу күнү олохтоохтор өр күүппүттэрэ. Саҥа дьылтан манна 80 киһи доруобуйатын көрдөрүнэр, 30 ыарыһах сытан эмтэнэр кыахтаныаҕа.


Бу күҥҥэ диэри балыыһа хас да 1960-1980 сыллардааҕы эргэ дьиэлэринэн үлэлээн кэллэ. Саҥа балыыһаны тутуу туһунан боппуруос 90-с сыллартан турбута. Ол эрээри дьайымтыалаах хамсааһын 2010 сыллаахтан саҕаламмыта - СР иккис президенэ Вячеслав Штыров дьаһалынан тутуу бырайыагын-сметатын докумуоннара оҥоһуллан бигэргэммиттэрэ. Оттон 2013 сыллаахха правительство уонна республика үһүс президенэ Егор Борисов таһымнарыгар тутууну саҕалыыр туһунан быһаарыы ылыныллыбыта.

Эһиилигэр, Сибиир уонна Уһук Илин биир кырдьаҕас куората Эдьигээн 380 сылын бэлиэтиир үбүлүөйдээх сылыгар, республикатааҕы уонна муниципальнай былаастар бииргэ үлэлээһиннэрин түмүгэр тутуу бастакы сваята туруоруллубута. Уонна дьэ 2013 сылтан генеральнай бэдэрээтчит «Альянс» ХЭО (ген. директор Рашид Аушев) тутууну тэтимнээхтик ыыппытын түмүгэр Арктика сылыгар дьиҥ-чахчы доруобуйа дыбарыаһа дьэндэйдэ.
«Хотугу улуус олохтоохторо, доруобуйа харыстабылын үлэһиттэрэ тутааччыларга, балыыһа тутуутугар күүс-көмө буолбут бары тэрилтэлэргэ барҕа махталбытын этэбит. Махтал истиҥ тылларын Саха Республикатын Ил Дарханыгар Егор Афанасьевич Борисовка тиэрдэбит», - диэн улуус баһылыга Алексей Мандаров үөрүүтүн үллэһиннэ..
Балыыһа аһыллыытын үөрүүлээх сиэригэр-туомугар Дьокуускайтан Ил Түмэн бэрэссэдээтэлин солбуйааччы Анатолий Добрянцев уонна доруобуйа харыстабылын министрэ Александр Горохов салайааччылаах бырабыыталыстыба тоҕус киһилээх делегацията кытыыны ылла