Константин Константинович Ильковскай Саха АССР Верхоянскай оройуонун Баатаҕай бөһүөлэгэр төрөөбүтэ. 1986 сыллаахха Ленинградтааҕы Г.В. Плеханов аатынан хайа институтун туйгуннук бүтэрбитэ. Идэтэ - хайа инженер-геолога, 1994 сыллаахха — РФ Правительствотын норуотун хаһаайыстыбатын Академиятыгар үөрэнэн, үрдүк категориялаах менеджерын дипломун ылбыта.

оскуолаҕа уонна иснтитукка үөрэнэр сылларыгар Саха сирин геологическэй партияларыгар маркшейдерынан уонна техник-геологынан үлэлээбитэ. Институт кэнниттэн 1986 сыллаахтан «Западнай» рудник учаастактааҕы геологынан, геолого-разведочнай экспедиция начальнигынан уонна «Якутзолото» Депутатскайдааҕы хайаны-байытар комбинатын сүрүн инженерынан үлэлээбитэ. 1998 - 1999 сылларга — Саха Республикатын промышленноһын миниистирин бастакы солбуйааччы.

1999-2000 сс Ильковскай СР президенин администрациятын салайааччытын бастакы солбуйааччы.

2000-2009 сылларга — «Якутскэнерго» ААО генеральнай директора, 2010 с — «Сахаэнерго» ААО директордарын сэбиэтин бэрэссэдээтэлэ, 2011 сыллаахха — «Якутское» ХЭТ директора. 2011 с. ахсынньы 4 күнүттэн Ильковскай — РФ алтыс ыҥырыылаах Государственнай Думатын депутата. «Сиэрдээх Россия» фракция чилиэнэ. Госдума энергетикаҕа Кэмитиэтин чилиэнэ.

2013 сыл олунньу 28 күнүттэн Ильковскай Забайкальскай кыраай губернаторын эбээһинэһин толорооччунан анаммыта. 2013 сыл балаҕан ыйын 8 күнүттэн Забайкальскай кыраай губернаторынан талыллыбыта.

Константин Ильковскай — экономическэй наука доктора. Саха Республикатын норуотун хаһаайыстыбытан үтүөлээх үлэһитэ, СР Государственнай бириэмийэтин лауреата. Саха Республикатын үс улууһун Бочуоттаах олохтооҕо.

Забайкальскай кыраай саахыматын Федерациятын салайар. Россия саахыматын федерациятын кэтээн көрөр сэбиэтин састаабыгар баар.

Ильковскай кэргэннээх. Икки уоллаах.