Бу чахчыны СР үлэ уонна социальнай сайдыы миниистирэ Николай Дегтярев историческэй түбэлтэ диэн эттэ. «2007 сыллаахха хамнас алын кээмэйэ олох алын кээмэйин аҥара эрэ этэ. Оннооҕор былырыын дьоннор олох алын кээмэйиттэн кыраны ылбыттар, ол 10 540 солкуобайга тэҥнэспит. 18,7% үрдээбит. Биһиги хамнас төлөбүрэ үрдээһинин кэнсиэпсийэтин көмөтүнэн, дьэ дьиҥнээхтик чопчу түмүктэри ситистибит», - диэн миниистир СИА кэрэспэндьиэнигэр кэпсээтэ.

Тохсунньу 14 күнүгэр СР Правительствота, Республикатааҕы профсоюз федерацията уонна республикатааҕы үлэнэн хааччыйар холбоһук үс өрүттээх регионнааҕы сөбүлэҥ түһэристилэр. Федеральнай бюджет үбүлэнэр сорох тэрилтэлэртэн ураты, үлэ нуорматын уонна чааһын толорбуттарга, докумуон 2014 сыл тохсунньу 1 күнүттэн күүһүгэр киирэр уонна үлэһиттэри барыларын таарыйар. Федеральнай таһымҥа бу сылга хамнас алын кээмэйэ 5 554 солкуобайга тэҥнэһэр.

Республикатааҕы профсоюзтар салайааччылара Александр Ким-Кимэн этэринэн, сөпсөһүү пууннарын толорууга, хас оройуон аайы көдьүүстээх үлэ ыытыллыахтаах.