Видеоконференция кэмигэр Алексей Стручков «Саха сиригэр бриллиант нэдиэлэтэ» тэрээһин концепциятын тилэри толкуйдуур, ис хоһоонун кэҥэтэр туһунан эттэ.

«2013 сылга Саха сирин бриллианы оҥорор собуоттара 5 млрд солк. бриллиант тааһы оҥорбуттара. Оҥоһуллубут таас 60 тахса бырыһыана Европа уонна Азия дойдуларыгар атыыламмыттара. Республикаҕа билиҥҥи туругунан алмааһы кырыылыыр аҕыс собуот бигэтик үлэлиир. Саха сирин бу промышленноһын эргитиигэ кэккэ мэһэйдэр бааллар. Бриллиант нэдиэлэтин чэрчитинэн саммиты ыытар, онно сокуонунан тирэҕи, алмаас сырьетын атыылаһыыны, дьыалабыай сибээһи кэҥэтиини кэпсэтиэх, ырытыах этибит. Саммит түмүгэр Саха сирин алмааһы кырыылыыр уонна ювелирнай тэрилтэлэрин үлэлэрин харгыстыыр мэһэйдэри туоратар, онтон тахсар суолу толкуйдуохтаахпыт, тобулуохтаахпыт. «Саха сирин бриллианнара» брэнди аан дойду таһымыгар таһаарыахтаахпыт. Ону таһынан оҥорон таһаарыы кыамтатын улаатыннарыахтаахпыт»,- диэтэ А.Стручков.

Саммикка инвестордар, Россиятааҕы уонна тас дойдутааҕы үп-харчы тэрилтэлэрэ кыттыахтара.