«Российскай хаһыакка» интервьютыгар кини 2014 сыллаахха туризмҥа «үгэс буолбут киэҥник биллэр» диэн Краснодарскай кыраайы, Киин России регионнарын — Иваново, Рязань, Вологда, Кострома уобаластарын ааттаата.

Ону таһынан ордук дойду иһигэр уонна тастан киирэн сылдьарга интэриэһинэйдэринэн уонна «холобурга сылдьар» программалаахтарынан ким да күүппэтэх регионнара – Коми Республиката уонна «Тымныы Полюстаах» Саха сирэ ааттанна.

Улахан кэскиллээх регионнарынан Александр Радьков манныктары эттэ: «Туризм сайдыытыгар олус улахан хардыыны Алтайскай кыраай оҥордо. Манна "Белокуриха-2" инникитин олус тахсыылаах буолара күүтүллэр. Сонун туристическай кластер Бурятияҕа Байкал күөлгэ оҥоһуллар. Чечня Республикатыгар бөдөҥ бырайыак тутуллар. Ити регионнар туристары тардыахтара диэн эрэнэбит».

Ростуризм баһылыга туристическай кластердар сайдыыларыгар үбү билигин сүнньүнэн Россия инвестордара угаллар диэтэ. «2013 сыллаах федеральнай целевой программа олоххо киириитэ дьиктини арыйда: төһө да наһаа байылыата суох уопсай макроэкономическэй турук баарын иһин, туризм эйгэтигэр көхтөөх инвестиционнай хамсааһыннар буоллулар», - диэн бэлиэтээтэ Александр Радьков.