«Арктика – олус уустук уонна наһаа кэбирэх эрээри, стратегическэй өттүнэн суолталаах регион.  Бүгүҥҥү олохпут сүрүн утарсыыта итиннэ сытар. Бэйэтин туспа уратыларынан Арктика территорияларын сайыннарыыга бырайыактар эрдэттэн туох да утарсыыны билиммэттэр. Государство өйөбүлэ суох маны кыайбаккын. Арктика зонатыгар олох таһымын быһаарар суолталаах кээмэйинэн биһиги хаалан иһэбит. Ол эрээри дьон экономика көрдөрүүлэринэн буолбакка, дьиҥнээх олох усулуобуйаларыгар олороллор. Биллэн турар, билигин ханнык эрэ улахан уларыйыылар тустарынан этэр эрдэ, ол эрээри республика Арктическай улуустарыгар кэнники сылларга аан бастаан капитальнай эбийиэктэр -- олорор дьиэлэр, хочуолунайдар, оскуолалар, оҕо саадтара тутуллан эрэллэр», - диэн бэлиэтээтэ кини.

Саха сирин баһылыга итини сэргэ «РФ Арктическай зонатын туһунан» саҥа федеральнай сокуон  бырайыагар республика Хотугу эргимтэҕэ сытар 13 улуустара килэриллибиттэрин ситистибит. Биһиги ити хайысханан өссө да салгыы үлэлиэхпит» диэтэ.

Билиҥҥи кэмҥэ республика правительствота 2014-2016 сылларга арктическай территориялар социальнай-экономическэй сайдыыларын уонна 2020 сылга диэри сүрүн хайысхаларын программаларын оҥоро сылдьар, диэтэ президент.

Ол курдук, Е.Борисов эппитинэн, быйыл РФ правительствотыгар Тиксии бөһүөлэгэр федеральнай арктического научнай-чинчийэр киини тэрийии туһунан этиилэри киллэрдибит.

Ону таһынан Хоту олохтоох омуктар тылларын, ураты культураларын уонна үгэстэрин государство өйөөһүнүгэр киллэрии сүрүн хайысха буолуоҕа. Ити сыалтан Борисов  правительствоҕа Хотугу норуоттар  национальнай Театрдарын тэрийии бырайыагын бүтэрэллэригэр сорудахтаата. Арктическай государственнай искусство уонна культура институтугар республика баһылыгын уурааҕынан Арктика норуоттарын культуратын Аан дойдутааҕы  киинэ аһыллыаҕа. Саха сирин баһылыгын өссө биир дьаһалынан Хотугу норуоттар дьоҕурдаах оҕолорун Аан дойдутааҕы арктическай оскуолаларын тэрийии  буолла.