Эһиилги бил баһын быйыл сиирбит ордук

Быыбар быйыл буолара ордук. Оннооҕор былырыын күһүҥҥүттэн саҕалаан, быыбар буолуо икки сыл инниттэн, кимнээҕэ-туохтара биллибэт политическай күүстэр Саха сирин салалтатыгар информационнай саба түһүү оҥоро сатаабыттара. Маҥнай «көмүсчүттэр» Москваҕа миитиннээн, национализма буруйдуу сатаабыттара. Онтон «барааннар» пикеттээбиттэрэ. Онно Егор Борисовы чубукуну көҥүлэ суох бултааһыҥҥа уорбалаабыттара. Уу суолунан хотугу улуустарга таһаҕас ситэ тиэрдиллибэтэҕин иилэ-хаба ылан аны Саха сиригэр «аччыктаан эрэллэр» диэн аймаммыттара. Эһиилгэ диэри өссө тугунан киирэн хой баһын туойуохтара биллибэт. Таммах оннооҕор сымара тааһы дьөлө түһэр: cорохтор хобу-сиби итэҕэйэн, быыбар дьалхааныгар хайдыһан хаалыахтарын сөп. Биир бэйэм санаабар, быйыл күһүн быыбар буола охсон, норуот бүттүүн куоластааһынынан талыллыбыт салайааччылаах кыстыкка этэҥҥэ киириэ этибит. Сахабыт сирин баайыгар-дуолугар суудайар быстах интэриэстээх, кэтэх санаалаах олигархическай бөлөхтөр угаайыларыгар киирбэккэ.

Михаил Николаев уонна Вячеслав Штыров иккилии болдьоххо республиканы салайбыттара. Михаил Ефимович судаарыстыбаннаспытын бөҕөргөппүтэ, Вячеслав Анатольевич промышленность иккис тыынын ыларыгар төһүү буолбута диэтэхпинэ сыыспатым буолуо. Оттон Егор Афанасьевич үлэтин-хамнаһын тыа сирин сайдыытын кэскиллээх былааннарын, уопсастыбаны, дьону-сэргэни уһугуннарыыны кытта сибээстиэх тустаахпыт. Олох-дьаһах туруктаах буолуута былааска утумнааһынтан, саҕаламмыт дьыала салҕанарыттан эмиэ тутулуктаах.

Владимир Путин Егор Борисовтыын көрсөрүгэр: «Республика салайааччытынан үлэлэлээн кэлбит кэмҥэр бэрт элбэҕи оҥордуҥ, иннин диэки сыҕарыйыы баара эмиэ көстөр», - диэн туран, быыбар болдьоҕун биир сыл иннинэ, быйыл күһүн буоларын өйүүрүн биллэрдэ. Соторутааҕыта Россия президенэ Саха АССР 100 сыллаах үбүлүөйүн бэлиэтиир туһунан ыйаахха илии баттаата. Аны, «АЛРОСА» хампаанньаны судаарыстыба хонтуруолугар хаалларарбытыгар дойду баһылыга бигэ өйөбүл оҥордо. Владимир Путин да, Егор Борисов даҕаны – биллэн турар, судаарыстыбанньыктар, иккиэн судаарыстыба уонна норуот интэриэһинэн салайтараллар. Ол иһин бэйэ-бэйэлэрин өйдөһөллөр. Федеральнай киин өйөбүлэ билигин баар. Аны дьон-норуот өйүүрүн быйыл күһүн быыбарга куоластаан биллэриэхтээх.

Википедия диэн интернет-энциклопедияҕа политиканы араас интэриэстэр киирсиилэрэ диэн быһаарбыттар. Ол эрээри атын эмиэ өйдөбүллээх: дьону-сэргэни сомоҕолуур. Политика - интэриэстэр киирсиилэрэ дуу, сомоҕолоһуу дуу? Быыбардааччы, ону бэйэҥ быһаар.