Дьахталлар аан дойдутааҕы күннэригэр

Антонина Софроновнаҕа уонна улуу тренербит Дмитрий Петрович Коркин огдообото Александра Семеновнаҕа Дьахтар күнүнэн сибээстээн турниры тэрийээччилэр үөрүүлээх быһыыга-майгыга улахан сибэкки туттардылар.

Күрэхтэһии иккис күнүгэр хаалбыт түөрт ыйааһыҥҥа тустуу буолла.

55 кг ыйааһыҥҥа 20 кыттааччы күөн көрүстэ. Манна саамай эрэлбит Александр Рассадин эчэйиилээх буолан кыттыыны ылбата. Онон хайдах эрэ саарбахтааһын баара. Хата ону Таатта ыччата, билигин Чурапчытааҕы физическэй культура уонна спорт институтун студена, 19 саастаах Федор Постников суохтаппата. Сүрдээх ыгым хапсыһыыларга мээнэ түһүөлээбэккэ, өйдөөн-төйдөөн уонна саамай кылаабынайа психологическай өттүнэн бэлэмэ үчүгэйин көрдөрөн, үһүс эргииргэ азербайджанец Хашаловы 1:1, финал аҥарыгар Кормильцевы (Красноярскай) 3:0 уонна финалга казах Кабатаевы 3:1 ахсааннарынан эрэллээхтик кыайталаата.

Бу ыйааһыҥҥа биир эрэлбит, Амма ыччата Владимир Егоров финал чиэппэригэр уолаттарга аан дойду күрэхтэһиитин кыайыылааҕа дагестанец Гасангусейн Бадрудиновы баһыйан тута сылдьан, киирсии бүтүүтэ ахсааны тэҥнэтэн (8:8) кэбиһэн хоттордо. Манна очкону аахсыыга хас да төгүл мөкүөр тахсан, хапсыһыы тохтуу сылдьыбыта, тустуу хаамыытын уонна тэтимин ыһан кэбиспитин санатар тоҕоостоох.

66 киилэҕэ 26 бөҕөс кытынна. Амма уола Герман Устинов кылгас тохтобул кэнниттэн урукку чөлүгэр дьэ саҥа киирэн эрэр курдук көрөбүн. Спорка кыра да куоттарыы элбэҕи быһаарарын билэр буолуохтааххыт. Өскөтүн Герман эчэйии ылбатаҕа эбитэ буоллар, билигин быдан атын киһи буола сылдьыахтаах этэ. Кини сүрдээх хатыһыылаах хапсыһыыларга Кытай, Казахстан, Тыва (Байыр Ондар) уонна Украина бөҕөстөрүн кыл-мүччү кэриэтэ кыайталаата. Украинец Михайловка 3:4 ахсаанынан хотторон иһэн, хапсыһыы бүтэрэ биэс сөкүүндэ хаалбытыгар атахха киирбит утарсааччытыгар “лампочка” диэн албаһы туттан, кылбар кыайыыны ситистэ. Онон түһүлгэ кыайыыга дьулуурдаахха мүчүк гынна диэххэ сөп. Оттон финалга Россия сүүмэрдэммит хамаандатын чилиэнэ Эми Умарпашаевка 5:8 ахсаанынан сабырыйтаран, пъедестал иккис үктэлигэр тахсар чиэскэ тигистэ.

Билэргит курдук, эдэр бөҕөстөрбүт кулун тутар бүтүүтэ Бурятияҕа буолар Россия финальнай күрэхтэһиитигэр кыттыахтара. Онуоха диэри өссө дьаныардаахтык дьарыктанан, Устинов тустар таһымын өссө үрдэтэр кыахтаах.

84 киилэҕэ кыттааччыбыт суоҕа олохтоохтору киэргэппэт. Оттон ыарахан ыйааһыҥҥа Ньургун Протопопов, Ион Болтунов уонна Виталий Тимофеев – Россия сүүмэрдэммит хамаандатын чилиэттэригэр утарсыыны кыайан оҥорбокко, эрдэ туораатылар.

Турнир чулуу тустуугунан Эбээн-Бытантайтан төрүттээх Олимпийскай эрэл училищетын үөрэнээччитэ, Роман Дмитриев кэриэһигэр турнир 50 киилэҕэ кыайыылааҕа Егор Потапов ааттанна. Кини Антонина Софроновна Дмитриева илиититтэн 50 тыһ. солк. харчынан бирииһи тутта. Оттон көрөөччүлэр биһирэбиллэрин ылбыт тувинец Начын Куулар – Роман Дмитриев дьиэ кэргэнин аатыттан анал бирииһинэн (уруһуй хартыыната) бэлиэтэннэ.

Турнир хапсаҕайынан түмүктэннэ. Маныаха 70 киилэҕэ диэри – 23, 70-тан үөһэ кг – 17 бөҕөс күөн көрүстэ. Түмүккэ бастакы ыйааһыҥҥа тувинец Байыр Ондар – азербайджанец Шерхан Джавадовы, оттон иккис ыйааһыҥҥа красноярец Юрий Власко – дагестанец Расул Магомедовы кыайталаан, сертифицированнай бриллианнарынан наҕараадаланнылар. Бу да сырыыга бэйэбит уолаттарбыт кыайан финалга тахсыбатахтара, элбэх сэмэни үөскэттэ. Кырдьык, бэйэбит көрүҥмүтүгэр “ытыспытын сотторбут” хомолтолоох.

55 кг: 1. Федор Постников (Россия, Саха сирэ), 2. Эльнур Кабатаев (Казахстан), 3. Гасангусейн Бадрудинов (Россия, Дагестан) уонна Афган Хашалов (Азербайджан).

66  кг: 1. Эми Умарпашаев (Россия, С-Петербург), 2. Герман Устинов (Россия, Саха сирэ), 3. Василь Михайлов (Украина) уонна Нурдаулет Ажикул (Казахстан).

84 кг: 1. Джабраил Шапиев (Россия, Дагестан), 2. Саид Дахкильгов (Россия, Москва), 3. Октавиан Ставила (Молдова) уонна Балжинима (Кытай).

120 кг: 1. Асадулла Ибрагимов (Россия, Дагестан), 2. Эдвард Кадалаев (Россия, Хотугу Осетия), 3. Юрий Власко (Россия, Красноярскай) уонна Дзамболат Кортяев (Россия, Хотугу Осетия).