“Роман Михайлович бэйэтэ история киһи”

-- Бастатан туран, тустуук быһыытынан мерканы биһиги Союз сүүмэрдэммит хамаандатын састаабыгар киирбит дьону ааттыыбыт. Ол аата, Роман Михайлович биллэн турар, бастакы нүөмэринэн сылдьар. Кини 48 киилэҕэ эрэ бастыҥ буолбатах, 52 кг ыйааһыҥҥа эмиэ лидер буола сылдьыбыта. Оччолорго күрэхтэһиигэ кыттыбат түгэннэригэр, Рафик Гаджиев киниэхэ эрэллээх солбуйааччы этэ. Онон киһи, Рафик Гаджиевы ханнык баҕарар таһымнаах күрэхтэһиигэ куттаммакка хамаандаҕа туруорар киһитэ. Ити улахан сыанабыл.

Роман Рафигы кыайар этэ, ол гынан баран, азербайджанец дьоһун утарсыыны оҥорооччу. Кини бэйэтэ сүрдээх сэмэй, көнө майгылаах, үчүгэй санаалаах, үтүө киһи. Рафигы өссө көбүөргэ ыраастык тустарын бэлиэтиэм этэ. Куруубайдаабат эҥин, төһө кыалларынан техническай арсеналын көрдөрө сатааччы. Кини тустарын киһи сөбүлээн көрөр буолара.

Манна даҕатан эттэххэ, “Роман Михайловичка саха уолаттара элбэхтик көмөлөспүттэрэ” диэн этэллэр. Мин итиннэ олох сөбүлэспэппин. Роман Михайлович соҕотох да эбитэ буоллар, син биир бастакы нүөмэринэн сылдьыа этэ. Онон ити сыыһа өйдөбүл дии саныыбын.

Роман Михайлович аатын төһө кыалларынан үйэтитии бара турар. Кини улахан история киһи. Ону ымпыгар-чымпыгар тиийэ үөрэтэн, кини олоҕун-дьаһаҕын туһунан эдэр ыччаттарга тарҕатыыга өссө да элбэх үлэ эрэйиллэр. Роман Михайлович бэйэтэ хаһан даҕаны бүппэт тема. Ханнык баҕарар темаҕа кини аата тэҥҥэ ааттаныан сөп. Политика буоллун, спорт буоллун, педагогика буоллун, тренер үлэтэ буоллун... Онон Роман Михайлович историята сүрдээх киэҥ.

Үгүс эдэр спортсменнарбыт ханнык күрэхтэһиигэ, ким аатынан күрэхтэһиигэ кытта сылдьалларын үчүгэй аҕайдык билбэттэр. Холобур, Николай Николаевич Тарскай аатынан республика чемпионата ыытыллар дии, онно бу эдэр спортсменнарбыт Тарскайы кимин ыйыттахха билбэттэр. Спортсменнар эргиччи сайдылаах, билиилээх-көрүүлээх буолуохтаахтар. Элбэх сиргэ-дойдуга сылдьаллар, хас турнирдар аайы аан дойдуну кэрийэллэр, ол иһин кинилэр билиилэрэ-көрүүлэрэ киэҥ буолуохтаах. Ханнык күрэхтэһиигэ, ханнык куоракка, оннооҕор ханнык дойдуга кэлбиттэрин сорохтор өйдүөхтэрэ суоҕа. Ону туоратар сыалтан элбэх матырыйаал тахсыан наада. Литература, эҥин араас матырыйааллар элбэхтик хомуллуохтаахтар. Холобур, Дмитрий Петрович Коркин туһунан сүрдээх аҕыйах матырыйаал баар дии саныыбын. Ити хомолтолоох. Сотору кэминэн Коркин диэн кимий диэн туруохтара. Онон ити боппуруоска биһиги көлүөнэ күүскэ үлэлиэхпитин, элбэҕи сырдатыахпытын наада.