«Муостаны тутуу хаачыстыбалаах буоларын туһугар кыаллары барытын оҥоруохпут», - диир «УСК Мост» ААО салайааччыта Игорь Тюнин.

Кини салайар компнията муостаны тутууга улахан уопуттаах. Владивосток куорат Босфор Восточнай хотоолун туоруур муостаны тутууга үлэлээбит.

«Өлүөнэ өрүһү туоруур муоста Российскай Федерацияҕа, баҕар, аан дойдуга да буолуо, ханна да хатыламмат ураты тутуу. Маныаха идэтийбит киһи, мин, ону бигэргэтэбин», - диэн эбэн эттэ.

«Институт «Стройпрооект» САО генеральнай дириэктэрэ  Алексей Журбин тутуу аныгы технологиялара хайа баҕарар тыйыс усулуобуйаны уйар кыахтаахтарын ойуччу тутан бэлиэтиир. Үлэ 12 ый уонна өссө үс ый госэкспертиза барара былааннанар. «Сылтан ордук кэминэн үлэни түмүктүөхпүт дии саныыбын», - диэн кини эбэн эттэ.

Алексей Журбин Санкт-Петербургтааҕы гидрологическай институту кытта муостаны тутуу уонтан тахса барыйаанын бэлэмнээбиттэрин туһунан кэпсээтэ. Ити барыйааннарга муус ноҕурууската аахсыллыбыт.

«Үлэни толорууга туох да кэһии тахсыа суоҕа. Онон Саха сирин олохтоохторо долгуйбаттарыгар этиэх этим. Хайа баҕарар тутуу айылҕаҕа содуллаах. Ону биһиги муҥутуурдук аччатыахпыт», - диэн эттэ.