Биллэрин курдук, 2011 с. ылыллыбыт федерация сокуонунан, 2012 сыл тохсунньу 1 күнүттэн бастакы медицинскэй-санитарнай көмө амбулаторияларга уонна күнүскү стационардарга эрэ оҥоһуллар.

Ол гынан баран, Саха сирин нэһилиэктэрэ бэйэ-бэйэлэриттэн ыраах сыталларынан, инфраструктура суоҕунан нэһилиэнньэ барыта аныгы медицинскэй көмөнөн кыайан хааччыллыбат. Билигин ыраах сытар сирдэр 152 учаастактааҕы балыыһаларыгар суукканы быһа үлэлиир 1148 куойка баар. Бу балыыһалар 300 тыһыынчаттан тахса киһи олорор 488 нэһилиэнньэлээх пуунун, о.э. республика нэһилиэнньэтин 35 бырыһыанын эрэ хааччыйаллар. Ыраах сытар 125 учаастактааҕы балыыһаны республика бэйэтин суотугар тутарга күһэллэр. Медицинскэй көмөнү босхо оҥорууга государственнай мэктиэ программатыгар 3 млрд. тахса солкуобай тиийбэт.

Итини учуоттаан, СР Государственнай мунньаҕа 33-с ыстатыйа 6 чааһыгар «Уһук Хотугу сир оройуоннарыгар уонна уонна онно тэҥнээх сирдэргэ бастакы медицинскэй-санитарнай көмө стационардарга оҥоһуллуон сөп» диэн эбии киллэрэргэ этии киллэрдэ.

Онон бу сокуон бырайыага федерация уонна регион таһымнаах парламентарийдар холбоһуктаах бастакы көҕүлээһиннэринэн буолла. СР Государственнай мунньаҕын дьоһун суолталаах көҕүлээһинэ Россия Федерациятын субъектарын сокуону оҥорооччуларын түмтэ.

– Биһиги сырабыт таах хаалбата. Биһиги туруорсуубут сөптөөҕүн итэҕэттибит. Аны саамай ыарахан түһүмэх күүтэр – Государственнай дума бастакы ааҕыытыгар көрүллүөхтээх. Дойдуга экономика, үп-харчы уустугурбутун учуоттаан, сокуон бырайыага бастакы ааҕыыны ааһыыта олус уустук буолуоҕа. Салгыы үлэлиэхпит, – диэн Саха сирин парламенын спикерэ Александр Жирков санаатын үллэһиннэ.