Сыыппаралар уонна чахчылар: Дьадаҥытык олорооччу ахсаана аҕыйыыр

Аныгы үйэҕэ нэһилиэнньэ дохуотун араастаһыыта, быһыыта, олох нуорматыгар кубулуйда. Промышленность, тутуу, энергетика, үп-харчы эргиирин үлэһиттэрэ баһырхай хамнаһы аахсаллар. Оттон атах-бытах үлэҕэ сылдьааччылар, ону таһынан алын сүһүөх үөрэхтээһин, тыа хаһаайыстыбатын салааларын үлэһиттэрин хамнаһа, сорох түгэҥҥэ тиийинэн олоруу да кээмэйигэр тиийбэт.

Бу дьоҥҥо өссө үлэтэ суохтары, биэнсийэлээхтэри, элбэх оҕолоох ыаллары киллэртээтэххэ, ахсаан сүүһүнэн тыһыынчаҕа тиийэр.

Билигин киһи нэһиилэ тиийинэн олоруутун кээмэйэ 11923 солк. быһыллан турар. Хамнас алын кээмэйэ 12515 солк. ааҕыллар. Бүгүҥҥү туругунан республикаҕа бу сууматтан кыра дохуоту аахсар дьон ахсаана 159 тыһыынчаҕа тиийэн, урукку сыллардааҕы көрдөрүүтээҕэр, дьадаҥытык олорооччу ахсаана аҕыйаабыт. Холобур, 2000 сыллаахха республикаҕа бу көрдөрүү 272 тыһыынчаҕа тиийэрэ. Манан сылыктаатахха, олохпут таһыма үрдээбитэ көстөр.