Бу, омос көрдөххө, солуута суох курдук эрээри, материальнай өттүнэн улахан содуллаах буруй көрүҥэ буолар. Оттон маннык буруйу оҥорооччунан үксүгэр оҕолор, эдэрдэр эбэтэр итирик дьон буолааччылар. Дьайыыларыгар соччо-бачча отчуот биэрбэт араҥа.

Олох көрдөрөрүнэн, эстэр сэп-сэбиргэл ууруллубутун туһунан сымыйаны иһитиннэрэр «төлөпүөн террористара» куруук кэриэтэ усулуобунай миэрэнэн накаастаналлар. Арай уонча сыллааҕыта «АЛРОСА» АК сөмөлүөтүгэр буомба баарын туһунан иһитиннэрбит «террорист» кытаанах режимнээх холуонньаҕа биир сылга көҥүлэ быһыллыбытын өйдүүбүн. Бу киһи онно эбии транспортнай милииссийэҕэ оҥоһуллубут хоромньуну төлүүргэ ууруллубута.

Оттон икки сыллааҕыта, от ыйыгар, Дьокуускай куорат дьаһалтатын дьиэтигэр буомба ууруллубутун, мэрия икки нэдиэлэнэн эстиэҕин туһунан биллэрбит киһи биир сыл түөрт ыйга көннөрүнэр үлэҕэ ууруллубута (хамнаһын 15 %-нын судаарыстыба туһатыгар биэрэн туран). Буоларын курдук, бу киһи итирик олорон оонньообута оҕус буолан хаалбыт.

Дьэ, онон, маннык буруйдары сэрэтэр туһуттан бу ыстатыйанан көрүллэр накаастабыл миэрэни кытаатыннардылар. Дьокуускай куорат прокурорун старшай көмөлөһөөчүтэ Марина Макарова иһитиннэрбитинэн, уларыйыылар Холуобунай кодекс 207-с уонна Холуобунай-процессуальнай кодекс 150-с, 151-с ыстатыйаларыгар киирдилэр. 207-кэ саҥа чаас эбиллэн биэрбит. Бу уларыйыыларга олоҕуран, ити дьайыытынан улахан хоромньуну (1 мөл.солк. тахса суумалааҕы) эбэтэр ыарахан содулу таһаарбыт буруйдаах 1 мөл.солк. диэри сууманан ыстарааптаныаҕа. Эбэтэр – бу киһи 18 ыйтан 3 сылга диэри ылар хамнаһын, дохуотун кээмэйинэн ыстараап төлүөҕэ. Эбэтэр – 5 сылга диэри болдьоххо көҥүлэ быһыллыаҕа.

Ис дьыала уорганнара, атын анал сулууспалар хас итинник сымыйа иһитиннэрии аайы бэйэлэрин тус үлэлэриттэн аралдьыйан, бириэмэлэрин халтайга барыыллара, үтүмэн ороскуокка тэбиллэллэрэ учуоттанан, итинник уларыйыылар киирдэхтэрэ буолуо. Бэлиэтээн эттэххэ,л 14-гэр диэри саастаах оҕо маннык оонньоотоҕуна, эппиэтинэһи төрөппүттэрэ сүгэллэр, хоромньуну кинилэр төлүүллэр.

Бу уларыйыылар ыам ыйын 16 күнүттэн олоххо киирдилэр.