Саатар Дьокуускай ханнык эрэ түгэх оройуонугар буолбакка, килбэйэр киинигэр, бырабыыталыстыба 1 №-дээх дьиэтин иннигэр (!) хаартыскаҕа түспүттэр. РФ ИДьМ-тын СӨ ИДьМ-тын экстремизмы утары охсуһар киинин оперативниктара бу кыргыттар кимнээхтэрин билбиттэр, булбуттар -- 1991 уонна 1981 сыллаах төрүөхтэр.

Кыргыттар полицияҕа быһаарбыттарынан, кинилэр от ыйын 4 күнүгэр “Түүҥҥү дозор” диэн оонньуу сорудаҕын толорон, итинник таҥныбыттар. Оонньуулара Америка тутулуга суох буолуутун күнүн утары анаммыт. Бэрэбиэркэ түмүгүнэн, процессуальнай быһаарыы тахсыаҕа. Сэрэйдэххэ, сэрэтии биэрэн баран, “оонньообуттара оҕус буолбут” кыргыттары административнай эппиэккэ тардыахтара.

Киһи сөҕөрө баар, өрөспүүбүлүкэ “үрүҥ дьиэтин” иннигэр итинник харахха быраҕыллар хара таҥастаах, муляж буомбалаах “террористкалары” ким да болҕойон көрөн, миэрэ ылбатаҕа! Арай дьиҥнээх шахидкалар буоллуннар? Таах хаардыы хаамыа, дьыаланы оҥоруо эбиттэр! Бырабыыталыстыба дьиэтин харабыллыыр полиция үлэһиттэрэ тутатына дьаһал ылыахтаах этилэр. Куһаҕанынан ыллахха, миэстэтигэр ытаталаан да кэбиһиэхтэрин сөп этэ (оонньуу сылдьалларын ким билиэҕэй).

Бу чахчыны аны прокуратура эмиэ бэрэбиэркэлиир буолла. Бэрэбиэркэ кэмигэр ити оонньууну тэрийээччилэр уонна уопсастыбаннай бэрээдэги араҥаччылыахтаах итиэннэ Бырабыыталыстыба дьиэтигэр үлэлиир полицейскайдар дьайыыларыгар сыанабыл бэриллиэҕэ.