Библиотека үлэһиттэрэ «Уруккуну анааран» ааспыт кэми сэгэтэн көрөн былыр биһиги өбүгэлэрбит уус-уран тыл сүмэтин тарҕатааччылартан саҕалаан, салгыы 70-80 сыллардааҕы кэмнэргэ ааҕыы хайдах сайдан испитин инсценировкалаан көрдөрдүлэр, ону тэҥэ ол кэмнээҕи туттар мал-сал,  олох-дьаһах сырдатылынна.

«Библионочь 2014» В. Яковлев-Далан «Дьикти саас» айымньытынан уһуллубут уус-уран киинэни көрүүттэн саҕаланна.

Саха ыалын сиэринэн кэлбит ыалдьыттары арыылаах алаадьынан, саламаатынан айах тутан күндүлээн, сиэри-туому тутуһан тэрээһини үөрүүлээхтик астылар.

Россияҕа саҥа сүүрээн быһыытынан киирбит флэш-моб үҥкүүтэ бу күн уратытык көһүннэ. В.П. Ларионов аатынан Майа орто оскуолатын үөрэнээччилэрэ (сал. Мучина Л.И.) мустубут дьоҥҥо үөрүүнү-көтүүнү бэлэхтээтилэр, саҥа, сонун үҥкүүннэн  киэргэттилэр.

Итиэннэ, «Сандалы остуол» маастар-кылаас дьон-сэргэ болҕомтотун тардан, үгүс сэҥээриини ылла. Шеф-повар В.Мартынова эт астартан амтаннаах бүлүүдэлэри, библиотека эдэр үлэһитэ С.Федорова судургутук оҥоһуллар, кэрэ көстүүлээх, минньигэс торт биир көрүҥүн, А.Охлопкова саха төрүт аһын - саламааты астаан көрдөрдүлэр, кэлбит ыалдьыттары күндүлээтилэр.

«Бастыҥ ааҕар дьиэ-кэргэн» анал аат Чичировтарга, Шишигиннарга туттарылынна, библиотекаҕа «Кинигэни бэлэхтээ» хамсааһын бастыҥнарынан Климентовтар, В. Охлопкова ааттаннылар. Майа олохтоохторугар анаан икки тылынан ыытыллыбыт тотальнай диктант түмүгүн кыайыылаахтара чиэстэннилэр.

«Дьиэ-кэрнэнинэн ааҕабыт» брейн-ринг күрэҕэр 4 ыал кытынна. Кыайыылааҕынан Сидоровтар дьиэ-кэргэн буоллулар.  Өй оонньуутун Мэҥэ-Хаҥалас улууһун административнай хамыһыйатын бэрэссэдээтэлэ Ф. Титов ыытта.

«Библионочь-2014» акция библиотека коллективын музыкальнай эҕэрдэлэринэн түмүктэннэ. "Инникитин тэрээһин ис хоһооно дириҥээн, кыттааччыта өссө элбээн үгүс киһи сэҥээриитин ылыа диэн эрэнэбит", - диэтилэр библиотека үлэһиттэрэ.