«Бөрө ахсаана 1,5 тыһыынчанан аҕыйаата. Саха сирин соҕуруулуу-арҕаа өттүгэр эрэ элбэх бөрө баара биллэр», - диэтилэр булт хаһаайыстыбатын департаменыгар.

Сыл саҕаланыаҕыттан ыла 427 бөрөнү бултаабыттар.

Ити бултааһын түмүгэр бөрө сылгыны өлөрүүтэ 47,9%, табаны сиэһинэ 47,4% намтаабыт. Ол да үрдүнэн тохсунньуттан ыам ыйыгар диэри 2178 таба, 110 сылгы бөрө аһылыга буолбут. Эбээн-Бытантаай улууһугар улахан хоромньу тахсыбыта бэлиэтэнэр. Манна 470 төбө «бөрөҕө былдьаммыт», Нерюнгрига - 357, Томпоҕо - 239, Алдаҥҥа — 190 төбө. «Хайалаах сирдэргэ самолетунан, вертолетунан көтө сылдьан бөрөлөрү ытыалааһын тохтотуллубутун түмүгэр бөрө ахсаана биллэр гына намтаабата», - диэн биэдэмистибэҕэ эттилэр.

Бөрө тириитин туттарыы иһин «Сахабулт» бу күннэргэ булчуттарга иэһин төлүөҕэ. Булт хаһаайыстыбатын департамена ити төлөбүрдэри нэдиэлэ аайы хонтуруоллуоҕа.