«Бырагыраамаҕа экономика көрдөрүүтүн өрө таһаарыы, муниципальнай салайыы систиэмэтин улаатыннарыы усулуобуйалара тыктарылынныллар. Ити усулуобуйа дьон олоҕун таһыма үрдүрүгэр быһаччы дьайар», - диэтэ улуус баһылыга  Виктор Павлов. 

Бүгүҥҥү ааҕыынан Үөһээ Дьааҥы улууһугар 11 780 киһи олорор. Экономика сүрүн салаата — тыа хаһаайыстыбата. Улуус 3 772 сүөһүлээх, 7 954 сылгылаах, 4 245 табалаах. Кэлиҥҥи кэмҥэ кэтэх хаһаайыстыбаларга сибиинньэни уонна көтөрү иитэллэр. Улуус эт, үт аһылыгы оҥорон таһаарар. 

Манна үлэтэ суох буолуу, хаарбах туруктаах, саахалланар кутталлаах дьиэ элбэх, коммунальнай инфраструктура, муниципальнай суол эргэрбит.

Муниципальнай инвестиционнай бырайыактарга тирэҕирэн нэһилиэктэр экономическай кыаҕы улаатыннаралларыгар улахан болҕомто ууруллубут. В.Павлов этэринэн, 15,5 мөл. солк. суумалаах бырайыактар реестрдэрин оҥорбуттар.

Биэс сыл устата бырагыраама олоххо киириитигэр 4 641 мөл. солк., ол иһигэр 38,5 мөл. солк. федеральнай, 251,8 — республика бюджеттарыттан анаммыт. 2,2 млрд солк. олохтоох, 30,8 — нэһилиэктэр бюджеттарыттан, 751,8 мөл. солк. бюджеттан атын үптэн-харчыттан киириэхтээх.

Бырагыраамаҕа ыйыллар тэрээһиннэртэн тыа хаһаайыстыбатын кыыла-сүөлэ элбэтиллиэхтээх, хамнас үрдүөхтээх, ДьУоКХ, социальнай эбийиэктэр саҥардыллыахтаахтар. Нолуок базата биллэ улаатыахтаах.

Бырагыраама сорох пууннарын экспертнэй сэбиэн чилиэннэрэ чуолкайдастылар. Холобур, индикаторы ааҕан таһаарыы. Экономика миниистирэ Валерий Максимов ити муниципальнай бырагыраамаларга баар кыһалҕатын эттэ. «Сыһыаны хаттаан көрүөххэ наада, тоҕо диэтэххэ, ити уруккулуу оҥоһуллар», - диэтэ миниистир. 

Республика правительствотын председателэ Галина Данчикова: «Итини үөскэтии методикатын уларыпаппыт. Тоҕо диэтэххэ, тус сыаллаахтык, бырагыраамалаахтык үлэлээбиппит ыраатта. Кэлэр сылтан ыла үс сылга болдьохтоох бюджекка көһүөхпүт. Муниципальнай бырагыраамалар государство гиэннэрин кытта уонна республика социальнай-экономическай сайдыытын бырагырааматын кытта дьүөрэлэһиэхтээхтэр. Икки ый иһигэр экономика министиэристибэтэ стратегическай чинчийии агенствотын кытта саҥа методиканы оҥоруохтаах», - диэтэ. 

Үөһээ Дьааҥы социальнай-экономическай сайдыытын докумуона үс күн иһигэр министэристибэлэри уонна биэдэмистибэлэри кытта сөбүлэһиннэрэр наадата этилиннэ уонна экономическэй сэбиэт бырагырааманы бигэргэттэ.