Миниистир сир баайын чинчийии уонна хостооһун инники күөҥҥэ тутулларын чиҥэтэн эттэ. Кини эппитинэн, бүгүн Сибиир илинин уонна Уһук Илиҥҥэ наадалаах баайдаах сирдэри энергетическэй өттүнэн хааччыйар туһугар БАМ уонна Трансиб кыаҕын улаатыннараллар.

Сергей Донской геологическай чинчийиини өрө таһаарар туһугар ылыллар миэрэлэри санатта. Онно Уһук Илин эмиэ киирэр.

«2013 сылга углеводороднай сырьену хостуурга нолуокка уонна таможняҕа, тарыыпка аналлаах дьоһун быһаарыылары ылыммыппыт. Онно тирэҕирэн табыгастаах экономическай усулуобуйа олохтонно. Уһук Илин сиригэр-уотугар инвестиционнай бырайыактары олоххо киллэрэр туһугар барыстан, баайтан-дуолтан уонна хостонор баайтан тутуллар нолуокка чэпчэтиилэри үөскэттибит. Ону таһынан нефть саппааһын ыларга сир туһалаах баайын хостооһун нолуогар (НДПИ) ыстаапка аччатыллыбыта», - диэтэ миниистир.

Сергей Донской этэринэн, үлэни көҕүлүүргэ эбии миэрэлэри ылар туһунан билигин элбэҕи дьүүллэһэллэр. РФ куораты тутар кодексыгар көннөрүүлэри киллэрэр бырайыагы министиэристибэ РФ правительствотыгар киллэрбит. Ити көннөрүү сири дьөлө хаһар скважиналары куораты тутуу экспертизатыттан таһаарарга, о.д.а сыһыаннаах.