«37 госбырагыраама олоххо киириитигэр 213,7 млрд солк, онтон 133,3 млрд солк. - республика бюджетыттан бэриллибитэ», - диэтэ экономика миниистирэ  Валерий Максимов. 

Кэлиҥҥи үс сылга Саха сирин экономикатын тэтимэ намтаабатаҕын туһунан кини эттэ. Регион ис валовай бородууктата триллион аҥаарыгар диэри үрдээбит. (2013 сылга үрдээһин 2% этэ) Республика сорох көрдөрүүлэрэ Россия индекаторын аһарбыттар. Регионнар рейтиннэригэр Саха сирэ 32-с кирбииттэн 6-ка диэри өрө таҕыста.  

«Аан дойду экономикатын көрдөрүүтэ бытаарбыт кэмигэр Саха сирин гиэнэ салгыы өрө тахсар. Дьон олоҕун таһымын үрдэтиигэ улахан болҕомто ууруллар. Хамнас алын кээмэйэ былырыын аан бастакытын аһаан, таҥнан олоруу алын кээмэйин кытта тэҥнэстэ», - диэтэ В.Максимов.  

2013 сыл түмүгүнэн, 37 госбырагырааматтан 9 көдьүүһэ суоҕа бэлиэтэннэ. Сөбүлэһиини хойутаан түһэрсии, аукциону, атыыны тэрийиигэ тардыллыы бюджеттэн бэриллибит үбү-харчыны ситэри туһаммакка халыы сүрүн төрүөтүнэн буолбут. Инвестиционнай бырагыраама 2013 сылга 17,6 млрд солк. туолбут. Ол эбэтэр былаан 82%. 

2013 сыллааҕы бюджет туолуутун туһунан үп миниистирин бастакы солбуйааччы Любовь Березкина иһитиннэрдэ. «Бюджет дохуота 136,7 млрд солк., ороскуота — 148,8 млрд солк., дефицитэ — 12,09 млрд солк.», - диэтэ кини. Нолуоктан киирбит дохуот былырыын биллэ аччаабыт. Оннук, барыстан нолуоктан республика бюджетыгар 21,1 млрд солк. киирбит. Ити 2012 сылы кытта тэҥнээтэххэ, 6,2 млрд солк. аҕыйах. Нолуогу төлөөччүлэр консолидированнай бөлөхтөрүн тэрийии нолуоктан дохуоту аҕыйаппыт.

2013 сылга бюджет ороскуоттаах чааһа 14,2%, ол эбэтэр харчытыгар таһаардахха, 18,5 млрд солк. улааппыт. Бюджет социальнай хайысхатын ыһыктыбат. Бюджет ороскуотун 50% итиниэхэ ананар.

Тутууга, гаастааһыҥҥа, ыччат политикатыгар анаммыт бырагыраамалар туолууларыгар сыһыаннаах ыйытыктары депутаттар көтөхтүлэр. Бюджет үбүн-харчытын туһаныы көрдөрүүтэ намыһаҕа министиэристибэлэр уонна биэдэмистибэлэр хонтуруоллара мөлтөҕөр сытарын кинилэр чиҥэтэн эттилэр. 

Публичнай истии кэмигэр видеоконференцияҕа Мииринэй, Ньурба, Өлөөн улуустара кытыннылар.