СИА-ҕа Ил Түмэн пресс-сулууспатыттан иһитиннэрбиттэринэн, мунньах кыттыылаахтара РФ Госдуматын депутата Михаил Николаев көҕүлээбит далааһыннаах тэрээһинин олоххо киллэрии хаамыытын ырыттылар.

Культура миниистирин солбуйааччы Владислав Левочкин Федерация Сэбиэтигэр «Музыка барыбытыгар» бырайыак Россияҕа культура Сылын ыытыыга биир саамай уйуктааҕынан уонна кэскиллээҕинэн бэлиэтэннэ диэн эттэ. Бастаан бу бырайыакка хас биирдии уопсай үөрэхтээһин оскуолатын бүтэрээччи биир классическай музыкальнай инструмены баһылаабытын туһунан сертификат ылыахтааҕын туһунан этэ. «Салгыы дьүүллэһии хаамыытыгар үс сүрүн түгэҥҥэ тохтуохха наада диэн түмүккэ кэллилэр: уопсай үөрэхтээһин систиэмэтин нөҥүө коллективнай музицирование систиэмэтин сайыннарыы, талааннары булуу систиэмэтин кэҥэтии уонна сайыннарыы итиэннэ бары социальнай эйгэҕэ музыкальнай искусствоны киэҥник тарҕатыы», - диэтэ миниистир солбуйааччыта.

Концепция үс кэрдиистээх буолуоҕа. Бастакы кэрдиис кэмигэр (2013-2016 сылларга) республикатааҕы ведомстволар икки ардыларынааҕы «Музыка барыбытыгар» программа оҥоһуллуо уонна олоххо киириэ, онно тирэҕирэн муниципальнай программалар ылыллыахтара. Бырайыак кыттыылаахтарын дааннайдарын баанын тэрийии былааннанар: оҕо музыкальнай оскуолаларын преподавателлэрин, уопсай үөрэхтээһин музыкаҕа учууталларын, чааһынай музыкальнай кадрдары. Музыкальнай кадрдары хаттаан бэлэмнээһин программата оҥоһуллара, оскуолаҕа музыка уруоктарын нэдиэлэҕэ үс чааска диэри элбэтэр былааннанар. Итини таһынан, хоровой общество тэриллиэ, оттон оскуолаларга музыка Күнүн бэлиэтиэхтэрэ.

Иккис кэрдиис (2016-2019 сыллар) республикатааҕы музыкальнай конкурстары тэрийии, теле уонна радио биэриилэринэн маассабай музыкальнай үөрэхтээһин кэҥэтиллиэ, саҥа информационнай технологияларынан, оскуола библиотекаларын музыкальнай литературанан байытыахтара.

Үһүс кэрдиискэ (2019-2022 сс.) Саха сирин бары оскуолаларыгар «Музыка барыбытыгар» бырайыак киириэ, республика уопутун Россия уонна аан дойду таһымыгар киллэрии.

Республика үөрэҕин миниистирин солбуйааччы Евдокия Никифорова министерство иннигэр үс сорук турда: материальнай-техническэй базаны тэрийии, кадрдарынан уонна үөрэтэр-методическай өттүнэн хааччыйыы, олорго 2016 сылга диэри 24 мөл. солк. бэрилиннэ. 2013 сыллаахха 200 синтезаторы атыыласпыппыт, олор республика оскуолаларыгар ыытыллыбыттара, үөрэх тэрилтэлэрин пианинонан, скрипканан, национальнай музыкальнай инструменнарына хааччыйыы ирдэниллэр, диэтэ.

Миниистири солбуйааччы этэринэн, бүгүҥҥү күҥҥэ Саха сирин оскуолаларыгар 329 ырыа учууталлара, эбии үөрэхтээһин тэрилтэлэригэр – 304 педагогическай үлэһит бааллар, олортон 33,3%-ра үрдүк үөрэхтээхтэр.

Ил Түмэн бэрэссэдээтэлэ Александр Жирков бырайыагы ситиһиилээхтик олоххо киллэриигэ бэйэтин этиилэрин киллэрдэ: «Туох-ханнык иннинэ уопсай үөрэхтээһин уонна музыкальнай оскуолалары хаачыстыбалаах музыкальнай инструменнарынан, сөптөөх педагогическай кадрдарынан хааччыйыахха, үөрэх былааныгар музыканан дьарыктаныы чаастарын эбиэххэ наада. Үөрэтэр-үп тирэҕэ тэрилиннэҕинэ эрэ бырайыак дьиҥнээхтик үлэлээн барыаҕа».

Мунньах түмүгэр, Жирков министерстволар брэстэбиитэллэригэр аныгыскы мунньахха үбүлээһиҥҥэ, үөрэх программатыгар музыка уруоктарын киллэриигэ, кадрдары бэлэмнээһиҥҥэ, музыкальнай инструменнары уонна үөрэтэр-методическай литератураны атыылаһыыга чопчу этиилэрдээх кэлэллэригэр сорудахтаата. Ону таһынан бырайыак бастакы кэрдиистэрин үбүлээһиҥҥэ республика 2014 сыллаах бюджетыгар көннөрүүлэри киллэриигэ, харчы сметатын оҥорорго этилиннэ.