Буолуохтаах мунньахха  депутаттар республикаҕа аҕыйах ахсааннаах Хотугу төрүт олохтоох омуктар дьыалаларыгар боломуочунай кандидатуратын бигэргэтиэхтээхтэр. Санатан эттэххэ бу дуоһунаска президент КМНС Ассоциациятын эппиэттиир секретарын  Константин Роббегы аныырга этии киллэрбитэ.

Итини таһынан биир сүрүн боппуруоһунан Саха сирин бас билиитигэр баар «АЛРОСА» акцияларын сорҕотун приватизациялааһын туһунан республика президенэ Егор Борисов тыл этиэҕэ.

Норуот талбыт дьонун иннигэр СР ИДЬМ-ын баһылыга Виктор Кошелев  ис дьыала органнарын 2013 сыл түмүгүнэн үлэлэрин туһунан дакылаат ааҕыаҕа.

Маны таһынан, правительство парламент көрүүтүгэр республика бюджетыгар бу сылга бастакы уларыйыылары киллэриэ.
Өссө пленарнай мунньах кэмигэр парламентарийдар «Общественнай хонтуруол туһунан», «Бюджет тутулун уонна бюджет хаамыытын туһунан», «Саха Республиката государственнай-чааһынай инфраструктурнай бырайыактарга бииргэ үлэлээһиҥҥэ кыттыытын туһунан» республика сокуоннарын барылын бастакы ааҕыыга дьүүллэһиэхтэрэ,

Пленарнай мунньах чэрчитинэн олунньу 4 күнүгэр Саха сирин баһылыга Егор Борисов республики парламеныгар уочараттаах Илдьитин этиэҕэ, онно 2014 сыллаахха былаас органнарын үлэтин сүрүн хайысхалара торумнаныахтара.