Күрэхтэһии Россия бэлиэ күнүгэр сыһыары тутуллунна. Төһө да табаарыстыы көрсүһүү дэммитин иһин, от күөх сукуна остуол ньууругар күөнтэһиилээх күрэхтэһиигэ иҥиир илиһиннэ, өй өрүкүйдэ. Улахан тургутуулаах оонньууга биллибитинэн, норуот депутаттарын уонна ситэриилээх былаас салайааччыларын 8 күрэхтэһээччилээх икки хамаандата биир тэҥ кыахтаах буолан биэрдилэр. Ол эрээри, күүстээх күүһэ өттө, кыахтаах кыаҕа баһыйда.

Ситэриилээх былаас хамаандатыгар республика баһылыгын уонна бырабыыталыстыбатын дьаһалтатын салайааччы Юрий Куприянов, Бэчээт департаменын салайааччыта Филипп Пестряков, булт хаһаайыстыбатын салайааччытын бастакы солбуйааччы Николай Додохов, ДьКХ миниистирин бастакы солбуйааччы Гаврил Левин, бырабыыталыстыба бэрэссэдээтэлин солбуйааччы Петр Алексеев, үп миниистирэ Валерий Жондоров, ыччат дьыалаларыгар уонна дьиэ кэргэн политикатыгар миниистир Афанасий Владимиров уонна республика баһылыгын уонна бырабыыталыстыбатын дьаһалтатын үлэһитэ Иван Лазарев киирдилэр.

Оттон депутаттар хамаандаларын састаабыгар Ил Түмэн тутууга уонна ДьКХ сис кэмитиэтин бэрэссэдээтэлэ Александр Романов, Бюджет, үп-харчы, нолуок, сыана политикаларыгар,бас билии уонна приватизация боппуруостарыгар сис кэмитиэт бэрэссэдээтэлэ Юрий Николаев, «Сахатранснефтегаз» генеральнай дириэктэрэ Иван Макаров, «Саха» НКИК президенэ Иван Андросов, Конституционнай суут бэрэссэдээтэлэ Александр Ким-Кимэн, парламент бэрэссэдээтэлин бастакы солбуйааччы Анатолий Добрянцев, депутаттар Гаврил Парахин уонна Алиш Мамедов бааллар.

Эрийсиилээх, илин-кэлин түсүһүүлээх, өрө күүрүүлээх күрэхтэһиигэ Юрий Куприянов Иван Андросовы, Филипп Пестряков Александр Ким-Кимэни, Николай Додохов Гаврил Парахины, Гаврил Левин Алиш Мамедовы куоһаран кыайыы өргөһүгэр буоллулар.

Депутаттар Александр Романов Валерий Жондоровы, Юрий Николаев Петр Алексеевы, Иван Макаров Иван Лазеревы, Анатолий Добрянцев биир дойдулааҕын Афанасий Владимировы кытта хатыһыылаахтык киирсэн кыайдылар.

Оонньуу 4:4 ахсаан буолла. Үһүс быһаарыылаах оонньууга 8:7 ахсаанынан ситэриилээх былаас хамаандата кыайыы көтөллөннө. Юрий Куприянов бэйэтин утарсааччытын 2:0 ахсаанынан хотон, хамаандата кыайарыгар олугу уурда. Табаарыстыы көрсүһүү кэнниттэн биирдиилээн киирсиилэргэ 1 миэстэни Николай Додохов, икиһи - Иван Лазерев, үсүһү - Гаврил Левин ылан үөрүүлэрэ муҥура суох.