- Дьаһалта мунньахтыыр саалатыгар буолбут мунньаҕы улуус баһылыга А. Т. Ноговицын салайан ыытта. Н. И. Дягилева республикаҕа тыа хаһаайыстабытын туругун кытта билиһиннэрдэ, соруктары туруорда. Сүөһү кыстыга этэҥҥэ ааһан эрэрин, аһылык тиийэрин, саас эмискэ сылыйан, ардах түһэн баран тоҥорон сылгы хаһан аһыырыгар күчүмэҕэйдэри үөскэппитин, онон сылгылары аһатыыга туруорбуттарын эттэ. Ол курдук, былырыын 48 тыһ. аһылыкка турбут буоллаҕына, быйыл 61 тыһ. сылгы аһылыкка киирбит. Үүтү соҕотуопкалааһын көрдөрүүтэ былырыыҥҥытааҕар үчүгэй, бастакы кварталлааҕы былаан аһара толоруллубут. Кризис кэмигэр кредит боппуруоһа уустугурбут. Ону бэрээдэктээһиҥҥэ үлэ ыытыллар. Эдэр фермердэргэ, дьиэ кэргэн фермаларыгар эбии үбүлээһини көрөргө кэпсэтии ыытыллар. Саха сирэ кооперацияны үчүгэйдик сайыннарбыт регионунан биллэр. Атыттар уопут атастаһа кэлэргэ сайаапка биэрбиттэр. Чурапчы улууһа тыа хаһаайыстыбатыгар инники күөҥҥэ иһэрин бэлиэтээтэ.
- Мунньах кэмигэр элбэх ыйытыы киирдэ. Сибиинньэ, куурусса аҕалан атыылааһыҥҥа үүт харчытыттан абаанса бэриллиэ дуо диэн ыйытыыга, бу үп аналыттан уратыга көҥүллэммэтэ этилиннэ. Сылгыны иитиигэ сүөһүгэ курдук эмиэ улахан болҕомто ууруллара наадатыгар, элбэх сылгыны көрөөччүлэргэ хамнас көрөргө этии киллэрилиннэ. Чурапчы бааһынай хаһаайыстыбалара, сүөһүлэрэ сүнньүнэн, 100-тэн аҕыйаҕынан, анал программаҕа кыайан хапсыбаттарын, онон итиннэ сөп программалары оҥорууга министиэристибэ үлэлэһэригэр көрдөстүлэр. Коллективнай хаһаайыстыбалары сэргэ чааһынайдарга эмиэ болҕомто уурулларын туруорустулар. Сылгы, убаһа этэ атыыланар кэмэ кылгаһын, ити атыылыырга уустуктары үөскэтэрин ыйдылар. 35 сылтан үөһээ үлэ ыстаастаахтарга пенсияларыгар эбии харчы көрүүтүн ыйыталаспыттарыгар, бырайыак Госдума көрүүтүгэр киирэн сытар диэн этилиннэ. Мындаҕаайытааҕы сүөһү иитэр комплекс үлэҕэ киллэриллиитин ыйыталаспыттарыгар, үлэлэрин былаанын чопчулаан, министиэристибэҕэ этиилээх киирэллэригэр сүбэлэннэ.
- Кэпсэтии түмүгэр киирбит этиилэр боротокуолланнылар, министиэристибэ итилэргэ болҕомтону ууруоҕа диэн миниистири солбуйааччы эрэннэрдэ.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети