Сылгы собуотун уонтан тахса сыл Александр Павлов күн бүгүҥҥэ диэри салайан кэллэ. Кини ыалдьыттарга собуот оҥорон таһаарар бородууксуйатын — убаһа этин, үүт аһылыгы көрдөрдө, амсатта. Саха боруодалаах сылгылары иитии, көрүү-харайыы — хаһаайыстыба биир сүрүн уонна тутаах үлэтэ. Бөртө маннык боруодалаах 1116 сылгылаах, онтон 653 - биэ. Итини таһынан хаһаайыстыба 682 төбө сүөһүлээх, итинтэн 270 - ыанар ынах.

«Былырыыҥҥыны кытта тэҥнээтэххэ, быйыл куһаҕана суох кэм саҕаланна. Быйыл төрүөхпүт ахсаана былырыыҥҥыттан элбэх буоларын күүтэбит. Ону таһынан ас бородууксуйатын оҥорон таһаарыыны биллэ улаатыннарыахпыт", - диир собуот дириэктэрэ Александр Павлов.

Хаһаайыстыбаҕа үлэлиир дьон социальнай өттүнэн көмүскэллээхтэр. Эргиппит харчыларынан үлэһиттэргэ анаан 10 олорор дьиэни туппуттар. Олохтоох дьаһалта көмөтүнэн сылгыны, сүөһүнү өлөрөр саҥа уонна үрдүк технологиялаах сыаҕы тутар былааннаахтар.

Ямалтан кэлбит делегация хаһаайыстыбаттан 160 төбө үөр сылгыны атыылаһыан баҕарарын биллэрдэ.