«Ыһыах — Саха сирин олохтоохторун барыларын бырааһынньыга. «Северное созвездие» площадкатыгар эбээннэр, эбэҥкилэр, юкагирдар, долганнар, чукчалар, Русскай устье олохтоохторун культураларын, олохторун-дьаһахтарын тустарынан билиһиннэрэбит, көрдөрөбүт», - диэтэ юкагирдар аҕа саасстаах дьонун сэбиэтин бэрэссэдээтэлэ  Вячеслав Шадрин. 

Бу күн долганнар ассоциациялара Хэйро — сайыны уонна күнү көрсүү, оттон Чукотка ассоциацията Кильвей — бастакы тугут бырааһынньыктарын бэлиэтээтилэр.

Русскай Устье олохтоохторо балыктааһын кэмигэр анаммыт сиэри-туому мустубут дьоҥҥо көрдөрдүлэр.

«Биһиги куорат Ыһыаҕар куруук кыттабыт. Быйыл Хэйро бырааһынньыкпытын Ыһыаҕы кытта тэҥҥэ тутан тэрийэргэ быһаарыммыппыт. Анаабыр улууһуттан, Үрүҥ Хайаттан оҕолор уруһуйдарын, олохтоох уустар тикпит таҥастара-саптара, бэлэмнээбит оҥоһуктарын ыыппыттара. Ыһыахха биһиги быыстапкабыт ураты улахан болҕомтону тарта», - диэтэ долганнар ассоциацияларын бэрэссэдээтэлэ  Елена Тимофеева. 

Саха сиригэр бүгүҥҥү ааҕыынан 1 900 долган омук баар. Балтараа тыһынчата Анаабыр долган-эбэҥки улууһугар олорор. Куорат ассоциациятыгар 200 киһи киирэр. Долган ассоциацията эһиил 20 сылын бэлиэтиэ.