«Киристэпиэр кэрэхсэлэ» ырыа-тойук дьоро түһүлгэтигэр Христофор Максимов ырыатын сөбүлээн толорор уонна дэгэрэҥ хайысхаҕа ыллыыр-туойар эдэр ырыаһыттар кыттыыны ыллылар. Ырыа ымыылаах Христофоровтар дьиэ кэргэн тапталларыттан ымыыланан ырыа буолан айыллыбыт нарын, истиҥ ырыаларын СР култууратын туйгуна Саарын кырыымпаҕа национальнай оркестр доҕуһуолунан аан бастаан ыллаан иһитиннэрдэ.

Сунтаартан төрүттээх, талааннаах ырыа айааччы, дьиҥ сахалыы, дэгэрэҥ ырыаны тарҕатааччы Саха Республикатын үтүөлээх артыыһа Сиэн Тиитэп бэйэтин саҥа ырыатын толордо. Христофор Максимов “Эйэ холууба” диэн биллэр ырыатын Михаил Санников ыллаата. Салгыы Хаҥаластан Николай Макаров байаан доҕуһуолунан ”Баҕа санаа” (Иван Гоголев тыллара), “Боккуойа” (Георгий Данилов тыллара), Олоҥхо тыйаатырын артыыһа Дмитрий Иванов “Күнү олус таптыыбын”ырыаны ыллаан дьон-сэргэ кутун туттулар. Дмитрий бу ырыаны олус табыллан ис дууһатыттан, иэйиилээхтик ыллаан уйан дууһалаах көрөөччүнү уйадытта диэххэ сөп. Кэнсиэр иккис чааһын СР култууратын туйгуна Валерий Лобанов саҥаран-иҥэрэн, ардыгар бэтиэхэлээн ыыппытын үрдүктүк сыаналаатыбыт.

Билигин дэгэрэҥ ырыаны ыччакка тарҕатар туһуттан, анаан-минээн улуустарга үөрэтэр дьоммут - Үөһээ Бүлүүгэ Айталина Мойтохонова, Аммаҕа Николай Протасов уо.д.а.таһаарыылаахтык үлэлии сылдьаллар, оҕолорун ситиһиилэринэн киэн тутталлар. Бүгүн иитиллээччилэрэ ыллаатылар-туойдулар. Лэкиэс “Төрөөбүт дойдум” уонна “Айанньыт” ырыатын сэргии иһиттибит. Василий Неустроев-Байаан Бааска Валерий Лобановтыын “Хаппытыан” ырыаны дуэтынан ыллаан көрөөччүлэр биһирэбиллэрин ыллылар.

Киристэпиэр Махсыымап аатынанфонда дэгэрэҥ ырыаҕа Ньурбанан, Амманан, Үөһээ Бүлүүнэн, Мэҥэ-Хаҥалаһынан, Уус-Алданынан, Горнайынан, Мирнэйинэн, Хаҥалаһынан араас таһымнаах күөн күрэстэри ыытар. Ол күрэстэр кыайыылаахтара Айтал Винокуров, Дьулусхан Данилов, Милена Борисова, Дайаана Андросова, Туяра Софронеева-Туойаана, Марианна Романова-Тайыына, Күннэй Иванова, Василий Новоприезжай, Василий Местников, Хаҥалас Өктөмүттэн Дьокуускайдааҕы тыа хаһаайыстыбатын филиалын студеннара (салайааччы Анна Яковлева) Дьулустаан Егоров толоруутун «Дьөһөгөй» үҥкүүнэн киэргэттэ.

Бу ырыа түһүлгэтэ 2017 с. Христофор Максимов төрөөбүтэ 100 сылын көрсөр тэрээһиннэр чэрчилэринэн ыытылынна. Режиссер Алтан Кыыс нүөмэрдэри бэркэ сааһылаан, уоту-күөһү, Эдуард Тойтонов сценографияны, Олег Романов видеоны үрдүк маастырыстыбалаахтык таба туһанан, дьүөрэлээн биир тэҥник сценаҕа таһааран көрөөччүлэр биһирэбиллэрин ыллылар.

Инникитин маннык тэрээһин кэмиттэн кэмигэр буолара эбитэ буоллар, көрөөччү киэҥ араҥата өссө кэҥиэ эбитэ буолуо диэн баҕа санаабын этэбин, ханныгын да иһин сахалыы куттаах ырыа өрүүтүн инники күөҥҥэ тахсыахтаах.