Сахалыы дьиҥ ырыа хайа баҕарар саха киһитин сүрэҕин нүөлсүтэр, сүргэтин көтөҕөр, дууһатын долгутар ураты айылгылаах. Кымыстыы кутуллар кылыһахтаах ырыаһыттар былыр былыргаттан ыҥырыыга сылдьаллар, ыһыахтары, кэрэ-бэлиэ түгэннэри киэргэтэллэр. Билиҥҥи да кэмҥэ оннук айылҕаттан айдарыылаах, сир ийэттэн этитиилээх ылбаҕай ырыалаах ырыаһыттар сахабыт дьонун үөрдэллэр, санааларын көтөҕөллөр.

Бу эрэ күн саха эстрадатын сулустара Варя Аманатова, Саарын, Анастасия Готовцева, Анатолий Бурнашев, Амгаяна, Дархан, Юлиана, Иван Трофимов, «Иэхэй-чуохай» фольклорнай кантри фольклорнай бөлөх уонна тыа сирин талба талааннаахтара Нам улууһун «Дьүрүл» фольклорнай бөлөҕө, алгысчыт Раиса Маркова, «Эр модун» үҥкүү бөлөх кыттыыны ыллылар. Маны таһынан, Августина Филиппова маанылаах таҥастара уонна Евдокия Иванова алгыстаах кырыйыыта дьоро киэһэни киэргэттилэр.

Алгысчыт Раиса Маркова Айыыһыт алгыһынан кэнсиэри арыйда, хара маҥнайгыттан дьон болҕомтотун сахалыы тыыҥҥа киллэрдэ. Онтон салҕыы бииртэн биир мааны көстүүмнээх, дорҕоонноохтук кутуллар кылыһахтаах куоластаах ырыаһыттар ылбаҕай ыллам ырыалара уонна эрчимнээх үҥкүүһүттэр чаҕылхай нүөмэрдэрэ көрөөччүлэри сэргэхситтилэр. Киһини кэрэхсэтэр Августина Филиппова чаҕылхай таҥастара дьон хараҕын сымнаттылар, эгэлгэ өҥнөрүнэн күлүмүрдээн хас биирдии кэлбит киһи сүргэтин көтөхтүлэр диэтэхпитинэ сыыспаппыт буолуо.

«Кымыстыы кутуллар ырыалар» кэнсиэр аата да этэринии киһи эрэ умсугуйа көрөр, харахтыын сымныыр, дууһалыын чэпчиир дьоро киэһэтэ буолла. Онон, кэлэр да сылларга бу ураты эриэккэс түгэн эбии чочуйан, тупсаран уонна сайдарыгар баҕа санаабын этэбин.



И.Коркина-Чугдаара