Олоҥхо Күннэригэр анаммыт тэрээһиннэр ахсынньы 15 күнүгэр диэри салҕаныахтара, маны тэрийээччилэртэн уонна толорооччулартан биирдэстэринэн А.Е.Кулаковскай аатынан Дьиэ Олоҥхотун Киинэ буолар.

Олоҥхо Күннэрин үөрүүлээх аһыллыытын таһынан, сэтинньи 26 күнүгэр Д.А. Томская сүүс сааһыгар аналлаах Верхоянскай улууһун уус-уран самодеятельноһын концера; сэтинньи 29-гар - «Олоҥхо олуктара»: «Олоҥхону чинчийии: оҕо өйүгэр ылыныытын нөҥүө» научнай-популярнай серия 2 томун сүрэхтээһин; ахсынньы 3 күнүгэр - «Олоҥхону этии искусствотыгар уһуйуу кыһалҕалара» фольклорнай коллективтар педагог-маастардарын уонна салайааччыларын семинардара; ахсынньы 9 күнүгэр - И. Избеков «Сур соноҕос аттаах Сургуулай Бөҕө» үҥкүү спектаклын көрдөрүү. Режиссер М. Боппоенова.