Сайсаар уокуругун управатыгар дьиэлэрэ умайбыт дьоҥҥо көмөнү хомуйаллар. Ону таһынан үбү-харчыны мунньар фонда тэриллиэҕэ. Умайбыт дьиэлээхтэр үөскүүр боппуруостары быһаарар уонна хонтуруоллуур уопсастыбаннай сэбиэти тэрийиэхтэрэ.

Борисовка микрооройуонун инженернэй уонна электрическэй туругун кэлимсэ бэрэбиэркэлиир анал хамыыһыйа тэриллиэҕэ.  «Манна саҥа дьиэлэри тутар туһунан толкуйдуубут. Онуоха инвестор уонна кэм-кэрдии наада», - диэтэ Неустроев. 

От ыйын 30 күнэ үүнэр түүнүгэр 3-с Борисовкаҕа 8 квартиралаах дьиэ уоттан күлгэ кубулуйда. Аттыгар турар дьиэ сорох  чааһа эмиэ уокка былдьанна. 2 саастаах оҕолоох, хат дьахтар уонна эр киһи уоттан олохторо быһынна. Борисовка-3 олохтоохторо эппиттэринэн, уоту умуруорар бастакы баһаарынай массыыналар кураанах кэлбиттэр.  «Баһаарынайдар элбэх бириэмэни гидраҥҥа холбоноллоругар бараабыттара. Кинилэр хаһан холбуохтарыгар диэри дьиэ бүтүннүүтэ умайбыта уонна уот аттыгар турар дьиэҕэ диэри тиийбитэ. Ол эрэ кэнниттэн умуруоруу саҕаламмыта», - диэтэ бу иэдээни илэ хараҕынан көрбүт киһи.  

Микрооройуон олохтоохторо 8 квартиралаах икки этээстээх 22 дьиэ баарын туһунан СИА-ҕа эттилэр. Электричество хаһаайыстыбата быстар мөлтөх туруктааҕа иэдээн сүрүн төрүөтүнэн буолбут. «Дьиэлэр анныларыгар электрическэй щиттэр тураллар. Хаар уулларын эбэтэр, ититэр ситим тоҕо бардаҕын ахсын бу щиттэр ууга былдьаналлар. Электрическэй кабель умайыт түбэлтэтэ элбэх. Биһиги уокурукка киллэрбит үгүс үҥсүүбүт күн бүгүҥҥэ диэри халтайга хаалар. Онон, субу эстэр кутталлаах буорахтаах буочукаҕа олорорго күһэллэбит», - диэтилэр олохтоохтор.