Бары истэ, билэ сылдьарбыт курдук, атырдьах ыйын 7 күнүттэн кэккэ дойдулартан аһы-үөлү, ол иһигэр сибиинньэ этин аҕалыыга бобуу ууруллубута. Россельхознадзор даннайдарыгар олоҕурдахха, өрөспүүбүлүкэ тас өттүттэн 6040 тонна сибиинньэ этэ кэлбит эбит буоллаҕына, итинтэн 5284  тонна омук дойдутугар оҥоһуллубут эт.

«Сыл устата тыыннаах ыйааһынынан 500-600 тонна эти оҥоробут. Дьокуускай ырыынагын 3 бырыһыанын ылабыт. Сибиинньэни иитэр комплексы кэҥэтии уонна сайыннарыы бырайыага бигэргэннэҕинэ, сыллааҕы көрдөрүүбүт 4500 тонна буолуоҕа. Көрдөрүү итинэн эрэ муҥурданыа суоҕа. Икки бүк улаатар кэскиллээх», - диэн СИА-ҕа эттэ комплекс дириэктэрэ Роман Максимов. Госэкспертиза комплексы кэҥэтии бырайыагын үчүгэйинэн сыаналыыбыт. «Саҥардыллыбыт комплексы Австрия, Германия бастыҥ архитектордара бырайыактаабыттара. Комплекс сибиинньэ этиттэн халбаһылары, о.д.а. минньигэс бородууксуйаны оҥорон таһаарар буолуоҕа», – диэтэ Р.Максимов.

Сибиинньэни иитэр комплекс дириэктэрэ эппитинэн, эккэ сыана үрдүүрэ күүтүллүбэт. Билигин сибиинньэ аҥаарын киилэтин 215 солк. атыылаһыахха сөп.