Украинаттан куоппут дьон Дьокуускайга кэллилэр

Бэҕэһээ, атырдьах ыйын 26 күнүгэр Дьокуускайга диэри Симферополь куораттан быһа рейс Украина 400 гражданын аҕалла. Манна кэлбит дьон аҥаардара Магадааҥҥа быһа аастылар. Украина иэдээниттэн куотан кэлбит 191 киһиттэн саамай кырдьаҕастара 89 саастаах, оттон саамай эдэрдэрэ 5 ыйдаах. Дьокуускайга бастаан утаа 179 киһи кэлэр диэн этэ, ол эрээри манна хаалыан баҕалаахтар ахсааннара эбиллэн, 191 буолла.

Дьокуускай аэропордугар кинилэри үлэ, социальнай сайдыы миниистирэ Алексей Дьячковскай, УФМС үлэһиттэрэ, ЫБММ психологтара көрүстүлэр. Дьон маннык күргүөмүнэн өрөспүүбүлүкэҕэ куотан кэлиитэ урут хаһан да суоҕа.

Россия тас дойдуну кытта дьыалаҕа министиэристибэтин даннайыгар сурулларынан, куотан кэлбит дьон ахсаана 700 тыһ. тахса. Дойду бары муннуктарыгар кинилэри быстах кэмҥэ олохсутар пууннар үлэлииллэр. Атырдьах ыйын 22 күнүгэр Саха сирин баһылыгын эбээһинэһин быстах кэмэ толорооччу Егор Борисов ыйааҕынан Нерюнгрига Украинаттан элбэх киһи кэлбитинэн ыксалаах быһыы-майгы биллэриллибитэ.

Үлэ, социальнай сайдыы миниистирэ Алексей Дьячковскай Хатаска баар урукку спец.оскуола дьиэтин 160 киһи быстах кэмҥэ олохсуйарыгар анаан оҥорбуттарын эттэ. Хаалбыт 30 киһи Дьокуускай интернат-дьиэлэригэр олоруохтара. Балаҕан ыйыгар Украинаттан 1035 киһи өссө эбии кэлиэҕэ.