Эбэҥки таҥаһын-сабын кэппит оҕолор толору мустубуттара саалаҕа ураты тыыны биэрдэ. Дьон-сэргэ сүргэтэ көтөҕүллэн, сэргээн, сэҥээрэн үөрүү-көтүү үксээтэ. Үөрүүлээх тэрээһин оҕолорго хоһоон куонкуруһунан саҕаланна. Бастакы-сэттис кылааска үөрэнээччилэрэ төрөөбүт тылларынан хоһоон аахтылар, истээччилэргэ кылгастык туох туһунан кэпсэнэрин быһааран биэрдилэр. Күрэстэһиигэ Дьокуускай куорат 31-с, 38-с, 21-с уонна Тулагы агро-оскуолатын үөрэнээччилэрэ кытыннылар.

Салгыы “Төрөөбүт тылгын төһө билэҕин?” диэн викторинаҕа үөрэнээччилэр уонна устудьуоннар кытыннылар. Сөптөөх хоруй иһин балл туруоруллан истэ. Түмүккэ дьүүллүүр сүбэ чилиэннэрэ оҕолор куонкуруска үчүгэйдик бэлэмнэммиттэрин, викторинаҕа көхтөөхтүк кыттыбыттарын, ол кинилэр төрөөбүт тылларын таптыылларын туоһулуурун, аҕам саастаахтар онтон олус үөрэллэрин бэлиэтээтилэр. Ыҥырыылаах ыалдьыт, государственнай уонна общественнай деятель, СР народнай суруйааччыта Андрей Кривошапкин үүнэр көлүөнэҕэ туһаайан төрөөбүт тылларын, культураларын таптыылларыгар, харыстыылларыгар сүбэлээтэ.

-- Биһиги сүрүн сыалбыт-сорукпут – эбэҥки тылын тарҕатыы, эдэр ыччаты, үүнэр көлүөнэни төрөөбүт тылын үөрэтэригэр, билэригэр угуйуу, көлүөнэлэр бэйэлэрин икки ардыларыгар чугас сибээстээх буолалларын олохтооһун. Бүгүн, көрөргүт курдук, ыччаттар уонна оскуола үөрэнээччилэрэ сүргэлэрэ көтөҕүллэн кыттыбыттара, төрөөбүт тылларыгар болҕомтолоохтук сыһыаннаһалларын туоһулуур, -- диэн эттэ тэрээһини иилээбит-саҕалаабыт, СР Эбэҥкилэрин ассоциациятын бырабылыанньатын чилиэнэ Анастасия Куличкина.

Бу күн ХИФУ педагогическай институтун устудьуоннара куукулаларынан остуоруйалары көрдөрдүлэр. Ол кэнниттэн салгыы бары төрөөбүт тылларынан караоке ыллаатылар, араас көрдөөх оонньууга кытыннылар.

Эбэҥки тылыгар анаммыт тэрээһиҥҥэ сылдьыбыт дьон үөрэн-көтөн тарҕаста. Ордук эдэр ыччат төрөөбүт тылын уонна культуратын таптыырыттан, билэргэ-көрөргө дьулуһарыттан астынна.