Лиэнтэ быһыллыбытын кэннэ муостанан грузовиктар субуһан аастылар, оттон сүрүн тутааччылар ити кэмҥэ, үгэс быһыытынан, күрбэ анныгар турдулар. Тутуу 36 метр уһуннаах уонна 10 метр туоралаах, эргэ муоста оннугар тутулунна.

«Бүлүү» федеральнай трасса республиканы дойду сүрүн транспортнай түмүктэрин кытта ситимниэхтээх, 2 800 километр уһуннаах. Дьокуускай уонна Мииринэй икки ардыларыгар 11 уу мэһэйдэрэ бааллар, олортон сылтаан трасса сылы эргиччи үлэлиир кыаҕа суох. «Бүлүү» суолун Управлениетын былаанын быһыытынан, быстыспат сырыы 2022 сыллаахха киириэҕэ. Саҥа күрбэ тутуута — итиннэ биир улахан хардыы.

«Бүлүү» тупсарыллыбыт массыына суолун учаастагын начальнига Константин Тарабуров этэринэн, күрбэ 50 сыл сулууспалыыр эрэллээх, уһун үйэлээх буолла. «Муоста тутуутун 2012 сыл кулун тутартан саҕалаабыппыт. Ыараханы уйуктааһына үһүс категориялаах суол ирдэбилигэр эппиэттиир», - диир кини.

Күрбэ уонна тулатыгар баар учаастак туттуутугар саҥа технологиялары уонна матырыйааллары көхтөөхтүк туһанныбыт, диэн «Бүлүү» суолун Управлениетын директора Николай Андреев журналистарга кэпсээтэ.

Билиҥҥи кэмҥэ Таҥнары уонна Бүлүүчээн диэн кыра үрэхтэри туоруур муосталар тутуулара түмүктэнэн эрэллэр.